【短片】【爆相爆片】欣澳站外蛇蛙大戰 邊個笑到最後?

呢排天氣潮濕,經常落大雨,搞到市民被迫留喺室內,但蛇、蛙就趁住呢種天氣,出嚟紓展吓筋骨、搵吓食,仲上映咗場蛇蛙大戰,片段令人不安,食飽嘅讀者小心!

話說禮拜二朝早9點幾,讀者林小姐途經港鐵欣澳站對出,離遠見到條蛇係咁扭來扭去,林小姐行近少少,先發現條蛇同一隻蛙肉搏緊,條蛇多次張開口想咬隻蛙,但因為對方脹卜卜,伸直四肢,郁都唔郁扮死咁,搞到條蛇纏又纏唔實,吞又吞唔到,可以話係無從入手。雙方糾纏咗至少3分鐘,趁條蛇鬆口唞一唞時,隻蛙趁機翻身走為上著,食到嘴邊都要嘔返出黎,隔住個mon都感覺到條蛇有幾咁失望。

小記請教蛙類專家劉惠寧,佢睇過條片後,一眼就認出片中兩位主角係亞洲錦蛙同台灣小頭蛇,亞洲錦蛙每逢落雨後就會出沒,平時喺草叢大聲叫就係佢哋喇,唔止佢,其實大部分蛙類喺被攻擊時都會谷到自己脹爆保命,身上同時會分泌黏液。

而亞洲錦蛙腳比較短,跳躍能力差,所以平時都係爬行,唔會跳。而另一位主角,台灣小頭蛇其實係無毒嘅,平時主要食爬蟲類,或者係蟲鳥蛋為生,由於係小型蛇,最長大約僅2呎半,所以攻擊力都唔強。

你敢爆,我敢獎! 立即WhatsApp《蘋果》24小時爆相爆片熱線致電:63836568
讀者林小姐提供。