周日例牌節目
發哥接送媽咪去飲茶

【爆相爆片】周潤發(發哥)是圈中出名的孝順仔,天下間他最錫的兩個女人,一個是97歲的高齡媽媽,一個是太太陳薈蓮。發媽雖然高齡,但身體好好,依然好精神,日前就被讀者李小姐透過《蘋果》的「爆相爆片」,分享發哥陪完媽咪飲茶,送她回家的相片。 【扶落車】■發哥陪完媽咪飲茶後,駕車送她回家。讀者提供圖片

坐輪椅防跌
■發哥一向侍母至孝,曾被影到拖實發媽出街。資料圖片 63歲的發哥以前經常被影到拖實發媽去食飯,不過近年發媽行路沒有以前方便,如果要出街,發哥都建議她坐輪椅,避免跌倒。發哥平時不用工作身在香港時,幾乎每個星期日都會駕車去到發媽位於堅道的寓所,接送發媽去飲茶食點心。

讀者李小姐表示:「聽講發哥朝早11點幾揸車嚟接媽咪出去,估計同媽咪去食晏,大約1點幾返嚟,咁啱我嚟呢度探親戚,有幸撞見佢同周老太。雖然周老太90幾歲,一頭白髮,但個樣仲好精神。」

主動打招呼
發哥對着發媽盡顯細心,李小姐指發哥落車後先放好輪椅,才慢慢扶媽咪坐上去,為她扣好安全帶,再與工人姐姐推媽咪上樓。當日,發哥在大堂見到任何人都主動打招呼,沒甚架子,十分親民。

其實發哥一向重視親情對家人好,除了發媽外,他對胞姊周聰玲甚為照顧,早前玲姐接受港台訪問時曾透露發哥為她置業,她直言有一句說話好想對弟弟說:「我想講無言感激,一個親人照顧得自己咁好係一種福氣,好感恩。每個星期屋企人都會出嚟食飯、飲茶,都係由佢召集兼埋單。」
採訪:鍾國仁