爆相爆片:汲水門橋6宗車禍
珀麗灣人苦等出島

■汲水門大橋「連中六元」,發生多宗串燒車禍。 「每日都會怕唔知邊日條大橋有事,怕會冇車搭,怕點返工返學」。噚日朝早7點幾,汲水門大橋「連中六元」,喺個幾鐘頭之內發生6宗車禍,撞咗21部車,最少3個人受傷,入機場方向塞爆唔在講,仲殃及埋馬灣珀麗灣嘅居民,因為啲巴士入唔到去。

噚日返工返學繁忙時間,兩三百個居民排隊呆等45分鐘先有巴士,結果遲晒大到。珀麗灣客運之前向運輪署申請削減部份渡輪班次,船未cut居民已經身受其害,「仲話想削減車船比例」。
居民朱太話,汲水門大橋同青馬大橋係出入嘅必經之路,一係就海路出入,但搭船嘅話只係去中環嘅班次比較密。噚日朝珀麗灣有5條巴士線運作,兩三百位居民排隊打晒蛇餅,當中有伯伯趕住入院做手術、有家長帶小朋友覆診,朱太自己都趕住返公司開會,結果佢都遲到咗成個鐘。
朱太就呻無論交通意外抑或惡劣天氣影響,令大橋擠塞甚至要封橋嘅話佢哋就慘慘豬,所以營運公司更加唔應該削減珀麗灣部份時段嘅渡輪班次、以車代船。