爆相爆片:
消夜男力戰攞你命3000

■兩男子一個手持利剪,另一人則握豉油樽圍住事主。 旺角噚日凌晨兩點幾發生血案!兩枱食客喺登打士街一間粉麵舖消夜,有人講嘢大聲嘈到隔籬枱,兩枱人嗌起上嚟,有人隨手擸起鉸剪拮落對方左邊臉近眼角,半邊臉披血。行兇嘅惡男之後同三個同伴帶埋把鉸剪走咗去,警方追緝緊佢。

■事主被襲至血流披面。 懷疑傷人之後走咗去嘅男人大約1.8米高,事發時着住淺色衫。讀者譚先生經過見到兩班人「講數」,當時39歲姓張男人左邊臉都係血,俾三個男人圍住,一個揸鉸剪,另一個手執玻璃樽,隨時攞你命3000。揸鉸剪男鬧傷者:「我冇攞威,我係被動,係嚟食嘢!」對方指「我都係嚟食嘢!」鉸剪男火起:「你食嘢,你冇得罪我哋?我哋嚟食嘢,你XX我哋!」,再鬧爆「我就唔X放佢……我要個公道!」

企喺傷者隔籬嘅男性朋友代佢求情,雙手合十向鉸剪男講咗句「大哥」,鉸剪男都唔肯罷休,差人到場前佢先走。