爆相爆片:警民擒茶壺賊 㩒地半粒鐘

■警員及途人合力將涉嫌盜竊嘅男子制服。讀者楊先生提供圖片 父親節各大小商場都人頭湧湧,將軍澳新都城二期就有個賊仔趁人多落手偷茶壺。好彩醒目職員即時追出,熱心途人仲同警員合力擒賊。
街坊楊先生嗰日落新都城行個圈,見到有事發生惹嚟市民圍觀,於是八吓,原來係阿Sir擒賊。楊先生話當時見到1樓一間服裝店外,有三個孔武有力嘅男人將另一個男人㩒喺地,周圍好多商場保安員圍住,後來索性用圍板圍封該範圍。
原來係阿Sir同途人合力捉住一個懷疑喺百貨公司偷嘢嘅賊仔,店員發現有人偷嘢就大嗌,仲衝出追賊,追到落1樓,途人同阿Sir就捉住個賊。楊先生話三人㩒住個賊成半個鐘,之後軍裝警員到場,用手銬拉個犯返差館。警方話,事發喺當日下晝5點06分,千色店職員發現有個男子攞走一套約值400元嘅茶壺,但冇畀錢就離開。案中27歲姓羅本地男子涉嫌偷竊,被捕帶署調查。