爆相爆片:愛的侏羅紀 恐龍哥接機𠱁細妹

最近有一套以恐龍為題材嘅電影上映,片中嘅恐龍被人捉咗出大都市……噚日朝早有一隻「恐龍」張牙舞爪出現喺香港國際機場接機大堂,金睛火眼望住出閘嘅人。
讀者劉先生昨早準備同家人出發外遊,喺接機大堂A出口見到有一隻恐龍雙手扶着欄杆,頭岳岳喺閘外望穿秋水。冇幾耐一個女仔同爸爸媽媽出嚟,一見到恐龍就大喊:「哥哥!」而恐龍哥哥亦回應話:「阿妹,我等咗你好耐!」阿妹見到恐龍哥哥,忍唔住興奮跳起,又摸吓頭握吓手仲攬到實一實,四萬咁口影相留念。

■由爸媽傍住嘅妹妹,一出閘就認出「阿哥」,興奮上前擁抱。 劉先生估計阿妹出國一段時間,所以哥哥先着起恐龍模型服𠱁佢開心,仲等阿妹安頓好先至換返衫,原來恐龍哥哥真身係一個戴眼鏡、打扮斯文嘅男仔。劉生睇見呢一幕好感動,指通常男仔對女友先會咁花心思,估唔到恐龍哥哥為妹妹一樣落足心機,仲覺得自己好幸運可以見到呢個溫馨和平嘅場面,「好sweet,希望社會可以多啲愛!」