爆相爆片:屈原咆哮 端午前氾濫
城門河淹單車徑

■前日城門河單車徑遭水淹,工人涉水為龍舟賽作最後準備。讀者江先生提供圖片 沙田城門河前日出現河水氾濫奇景,河水淹浸沙田運動場對開河畔單車徑,水位仲深到腳眼咁高,甚至對岸富豪花園行人隧道亦都浸埋。市民都話好少見,天文台就話可能係天文大潮引致。
「沙田友」江先生前日朝早近中午經過沙田運動場城門河畔,見到河水氾濫淹浸河邊單車徑。當時水位深到腳眼,間中有人踩單車嚟到見到咁,都要澗水而過。現場有工人為咗準備噚日端午節嘅龍舟賽,惟有濕住腳搭好龍舟比賽看台作最後準備。

天文台︰或天文大潮所致
江先生話以往端午前後都冇見過咁樣嘅水浸,嗰日又唔係打風,亦唔似大潮,但城門河水位竟氾濫高過單車徑水平面,情況相當罕見。佢好擔心咁嘅情景係唔尋常,懷疑可能係溫室效應全球暖化,令水位持續上升嘅後果,希望大家都可以正視同盡多啲力保護環境。佢仲話城門河水係鹹水,如果持續水浸單車徑同河畔地方,恐怕會加速設施損毀,建議當局考慮喺城門河畔加建約一呎高嘅河堤,保護河畔設施。
同一時間,當日都有其他網民話喺對岸嘅富豪花園對開,見到河邊行人隧道水浸,網民都話奇怪。
根據天文台距離城門河最近嘅大埔滘觀測站,潮汐監察數據顯示周日中午12點幾,潮汐最高水位為2.84米,較前一日(星期六)正午時分錄得嘅2.89米已經低咗5厘米,亦唔係咩新紀錄。天文台話,估計城門河單車徑水浸可能係因為天文大潮,但都唔排除同時受到其他地區性因素影響,因為大埔滘觀測站始終同城門河有一段距離,未必能夠完全反映城門河嘅情況。即係講嚟講去唔知點解城門河會氾濫!