爆相爆片:
大庭廣眾問罪 
破紀錄港女摑不忠男友41巴

■港女懷疑男友不忠,喺油塘站外動武。 問世間情是何物,情侶間嘅小風波,旁人懂甚麼?但係搞到當街互摑仲扯頭髮就實在太失禮喇!文員卓小姐前日下晝4點行經油塘港鐵站B出口,聽到大大巴摑落臉嘅啪啪聲,「起碼打咗幾十巴!」卓小姐所拍片段見到當時一對情侶喺站外一角嘈交,「個女仔狂摑個男仔,事緣好似係女仔覺得男嘅偷食出軌!」記者翻睇全長2分05秒嘅片段,發現至少傳出41下掌摑嘅啪啪聲,「41巴港女」頓成噚日網上紅人。

男友扯頭髮反擊
片段中孭住桃紅色袋、着住短裙嘅女事主,將男友逼埋牆角,一路指手劃腳,懷疑男友出軌,大興問罪之師。鬧完就摑,左手摑完輪到右手摑,男友其間亦曾還擊摑番對方一巴,仲扯女仔頭髮搖咗幾次,但佢一直冇否認出軌,只係𠵱𠵱哦哦,女事主越鬧越激動,不停話「肯定有」、「10幾條女……你自己搵10條女搞嘢」,清脆掌摑聲傳遍油塘站。
卓小姐話唔少途人都睇到呆咗,「好多人停低,但冇人幫手或報警」,最後由港鐵職員出嚟查看。大部份留言網民都覺得41巴港女太暴力,記者噚日訪問咗啲情侶及女士,佢哋亦認為41巴港女做法唔啱,伴侶出軌雖然好錯,但可以即時分手或者返屋企慢慢傾,唔應該大庭廣眾打人。港鐵發言人就話根據車站紀錄,周四下午約4點油塘站職員接到乘客通知B2出口有一男一女爭執,職員即時詢問兩人有冇需要協助,但佢哋好快就離開車站範圍。