【短片】【爆相爆片】切線爬頭捱的士撞 鐵騎士打觔斗滑行100米

電單車有名你叫「皮包鐵」,雖然揸起上黎好有型,但係發生意外時,鐵騎士就好好危險,好似北大嶼山公路呢位「華Dee」,就畀的士撞到跌落地,仲連打幾個觔斗,好彩後面嘅車煞得切掣,唔係隨時變肉醬。

的士司機李先生,今朝早上7點幾,載客去機場,沿住北大嶼山公路中線行駛,過咗小蠔灣車廠冇耐,右邊突然有架電單車切線爬頭,李先生話,電單車當時無打燈,而且車速好快,連超幾架車,好似好趕時間咁,當佢駛到一架的士旁邊時,架的士咁岩由中線切到去快線,將電單車撞倒,鐵騎時即時跌落地,仲喺馬路上連打幾個觔斗,而架電單車繼續向前滑咗約100米先停低,尾隨嘅私家車司機反應好快,即刻抽去中線,李先生亦都馬上減速「好彩人哋煞得切,唔係實撞死佢!」李先生認為,鐵騎士嘅責任最大,「淨快線切去中線已經唔岩,抽黎抽去,仲行得咁快!」

警方回應指,姓梁(44歲)電單車司機,及姓郭(58歲)的士司機事後通過酒精呼氣測試,電單車司機腳部受傷需送院。

你敢爆,我敢獎! 立即WhatsApp《蘋果》24小時爆相爆片熱線致電:63836568
鐵騎士遭的士撞倒後,喺馬路上連打幾個觔斗。(讀者李先生提供)