【短片】【爆相爆片】大圍馬騮搶主婦膠袋 為食物抓傷小朋友額頭

大圍猴王出沒注意!住喺大圍美田邨嘅李先生,上周五(4日)下晝1點幾落街,喺香粉寮街同美田邨美致樓對開交界、停車場閘口前嘅過路處,睇到一幕「猴王獵食記」,猴王強搶婦孺拎住嘅膠袋,仲撲上個小朋友度抓傷咗佢,然後即席開餐。

點解李先生會叫呢隻馬騮做猴王呢,佢話呢隻比其他雄性馬騮都要威猛、唔驚人,感覺上好似大阿哥咁款,佢之前未見過咁大隻,呢隻係特別大隻,仲話佢嘅性徵好有睇頭喎。

李先生落到街已經見到途人望住猴王,初時猴王喺香粉寮街美田商場對面馬路摷垃圾筒,「佢企喺地下伸手入去、連埋個頭伸入垃圾筒都仲綽綽有餘!」可想而知佢幾高大。然後猴王坐喺馬路欄杆開始獵食,佢離遠見到有人揸住白色或者紅色膠袋,就連跑兩條行車線直衝埋去斜對面嘅行人路,李先生:「見佢連續3、4次衝過對面線搶嘢食,喺轉角位坐低食嘢,食完又跑返過對面馬路,再捕下一個人!」

李先生影到其中一條片段,猴王搶個女人拎住嘅白色膠袋,入面有嘢食,個女人作勢兇下佢,佢完全唔驚,個女人即刻急急腳走人。搶完個女人之後,另一個女人帶住個小朋友,咁啱同猴王迎面相遇,嗰個大約6至7歲嘅小朋友拎住袋嘢食,隻馬騮撲上個佢度,抓傷佢額頭,搶佢袋嘢食,施施然落返地。小朋友嚇到當場喊,佢媽咪好緊張攬住佢檢查傷勢,然後慢慢離開。猴王就繼續坐喺原地食嘢。

搶完幾個人嘅嘢食,唔知猴王係唔係飽得滯,地下仲有幾個叉燒包未食,佢就爬返上樹。李先生話區內一向都有馬騮出沒,近期最誇張應該係舊年年頭,超過50隻馬騮衝落美田邨,有馬騮爬上低層單位入屋攞嘢食,驚動居民報警,保安要揮竹枝趕猴。加上馬騮搶食唔係新鮮事,所以李先生初時冇諗過要報警,但冇諗到猴王會整傷小朋友,嗰對母子好快就走咗,佢都愛莫能助。

你敢爆,我敢獎! 立即WhatsApp《蘋果》24小時爆相爆片熱線致電:63836568
在美田邨附近出沒的猴子絲毫不怕人,間中更會搶途人的膠袋。(讀者李先生提供)