【短片】【爆相爆片】舊愛暗撻陳瀅 余香凝孖保險才俊中環尋歡

半年時間話長唔長,話短唔短,要發生,有好多事都可以發生!就好似一對情侶,半年時間可以分手、復合、再分手,又或者分手、傷心、有新歡,25歲嘅余香凝同32歲嘅陳家樂就係好例子。

去年6月,余香凝被指背拍拖近4年嘅陳家樂劈腿,多次去保險才俊許焯倫(Victor)屋企宿一宵(新聞連結:https://bit.ly/2ymDgVn),事後陳家樂喺傳媒面前含淚承認情已逝,女方被封「拜金港女」後好委屈咁話,兩人拍拖以來,財政一直獨立,而最最最最重要係,余香凝話佢喺Victor屋企過夜,只係開會開通宵啫!

好喇!半年前嘅嘢講完,講番近期啲先;陳家樂同陳瀅去年12月開始傳緋聞,《蘋果》讀者仲影到兩人喺中環日本餐廳撐枱腳(新聞連結:https://bit.ly/2CZ4WQC ),當然,兩位當時人事後例牌否認拍拖,仲夾晒口供話只係收工普通食餐飯。之但係,上個星期佢哋又俾周刊影到,齊齊喺東京返香港,返到香港機場,仲戴晒口罩兼前後腳出閘,就唔知兩位當時人會點兜喇!

講番陳家樂舊愛余香凝,隨着前度感情極速有「着落」,余香凝嘅感情生活,又係咪已經ready浮面呢?延續去年6月被爆喺Victor屋企過夜,佢堅持冇劈腿後,《蘋果》讀者謝小姐前晚透過「爆相爆片」,分享咗喺中環歐陸嘉年華,見到余香凝同Victor玩攤位遊戲嘅相片。謝小姐受訪時話:「嗰晚10點半,我喺一個玩拋圈仔嘅攤位見到佢哋,佢哋啱啱企正喺我對面玩。」

謝小姐仲話:「余香凝嘅警覺性都幾高,基本上我一攞個電話出嚟,已經被佢望到實,佢見到我向佢嘅方向影相,就即刻匿喺個男仔身後,然後掟埋手上嘅圈圈就即刻走,大約都係玩咗6分鐘左右。」

從相片所見,頭戴Cap帽、化咗淡妝嘅余香凝,警戒心的確比Victor強,就算玩緊攤位遊戲,雙眼都好留意面向自己嘅鏡頭,反而Victor就完全唔發覺有人影相,玩得好投入。謝小姐續表示,相信余香凝因為見到有鏡頭對住佢,所以全程同Victor冇乜交流,各有各掟,玩完就即刻離開攤位。

余香凝之後都有喺Ig貼出去嘉年華嘅相,當然相入面唔會見到Victor身影,佢只係貼咗同前年嫁咗富二代老公、o依家大緊肚嘅模特兒鄧穎堯(YoYo)合照,余香凝同YoYo一齊攬住個大大嘅熊仔公仔影相,佢喺Ig貼文話:「契媽同Chu Bae一齊去AIA,今年仲喺Yo個肚度,下年我抱住!」

【編輯推介】

【林嶺東設靈】由澳門趕返港送別戰友 發哥拖發嫂哀傷致祭
https://bit.ly/2VEpNjh

【宇宙最強外母】甄子丹影全家福做配角 60歲索外母晒腿最搶鏡
https://bit.ly/2QuIFO1

【粉絲企圖強姦】NGT山口真帆直播哭訴 驚爆隊友教唆兩男上門施襲
https://bit.ly/2sjzWEG

【比整容更厲害】網民晒「易容術」 劉嘉玲:這個妝化得比劉嘉玲還要好
https://bit.ly/2TFZnMq

【《男朋友》集集追】咀足四集! 朴寶劍送情侶戒冧喬妹
https://bit.ly/2SRYUXa

精選娛聞,喺晒《娛果》
http://fb.com/appledailyent
余香凝同Victor星期二晚去中環嘉年華玩。(右:讀者提供圖片) 余香凝對鏡頭好敏感。(讀者提供圖片 ) 余香凝喺Ig貼咗佢同模特兒YoYo去嘉年華嘅相(Ig圖片) YoYo老公都有去。(Ig圖片) 余香凝15年同陳家樂拍港台劇撻着,熱戀期經常孖住出巡。(資料圖片)