中學男生在粉嶺站向紅磡方向月台候車期間,疑顧着看手機失平衡墮軌,由職員協助爬回月台。(讀者劉先生提供)

【爆相爆片】12歲學生哥返學途中墮軌

「往紅磡列車現在到站,乘客請勿超越黃線……」周三朝早7點幾,當港鐵東鐵綫粉嶺站往紅磡方向月台播出呢句廣播嘅時候,喺月台等緊車嘅劉先生,見到有個着校服嘅中學男生突然間跌咗落路軌,當時係繁忙時間,月台都有唔少乘客等車,亦有月台助理喺度維持秩序,大家見到咁嘅情況都好緊張,月台助理即刻叫男同學匿入去救生槽。

劉先生話,冇幾耐估計係因為仲未見有車埋站,月台助理最後叫個男生捐返出嚟,夾手夾腳扶返佢上月台,好彩見佢都冇乜大礙。港鐵發言人證實,周三朝早7點40分,粉嶺站有車站職員同乘客見到一個男乘客喺往紅磡方向嘅2號月台跌落路軌,當時月台冇列車,職員同乘客即刻按動月台上嘅緊急掣,避免有列車進出車站。

車站職員同時通知車務控制中心報警及召喚救護車。在場職員即時扶返嗰個乘客上月台。墮軌乘客同職員講,因為睇手機失平衡跌落路軌,佢右手肘輕微擦損,職員之後通知佢嘅家人,佢喺家人陪同下由救護車送院檢查。警方亦喺朝早7點55分接報相關事件,墮軌12歲男生姓簡,警方初步調查相信事件冇可疑,列作有人墮軌處理。

港鐵發言人藉此機會,呼籲乘客要注意個人同其他乘客嘅安全。

你敢爆,我敢獎! 立即WhatsApp《蘋果》24小時爆相爆片熱線致電:63836568