【短片】【爆相爆片】聖誕男港鐵內情難自禁啜爆「湯洛雯」

「地下鐵碰着她,好比心中女神進入夢……」一個戴住聖誕帽、着橙色格仔恤衫同軍綠色長褲嘅六呎猛男,喺港鐵嘅車廂遇到佢心目中嘅女神,仲情不自禁,走上前輕吻女神嘅前額。畫面就好似童話故事咁浪漫。但如果,佢只係錫女神一張貼喺車廂入面嘅廣告海報,件事係唔係即刻唔同晒?

讀者阿Dan星期一夜晚8點幾,乘搭港鐵港島綫向堅尼地城方向嘅列車期間,聽到有類似跌手機落地嘅聲音,於是向聲音傳嚟嘅方向望過去,畀佢見到一個身高有1.8米嘅男人,眼甘甘望住貼喺車廂入面一張廣告海報,而且仲不斷錫印喺海報上面嘅長髮女代言人。

話說嗰張海報係推銷面膜嘅廣告,搵嚟有「靚湯」之稱、現年31歲嘅無綫小花湯洛雯做代言人影硬照。當時阿Dan同六呎男都有一段距離,睇唔到海報入面令到六呎男如癡如醉嘅女神係邊個,只係覺得佢行為好奇怪,於是離遠攞手機影低佢。從阿Dan拍攝短短18秒嘅短片中,可以見到六呎男都幾癡情,佢拎住個手機,突然間一手撳住海報,跟住咀落海報嘅湯洛雯個前額,錫完一啖,佢情深款款咁望住「靚湯」,然後又繼續連環輕吻「靚湯」三吓,之後繼續定格望住張海報。

阿Dan話六呎男事後仲用手機影低張海報添,而坐喺海報側邊座位嘅女乘客,似乎顧住傾偈,冇為意呢一幕情景。最終阿Dan同六呎男不約而同喺中環站落車,阿Dan見六呎男咁早就戴定聖誕帽,估計佢可能要過一個Lonely Christmas,所以搵廣告海報中嘅女神慰藉一吓喎。

你敢爆,我敢獎! 立即WhatsApp《蘋果》24小時爆相爆片熱線致電:63836568
一名戴住聖誕帽嘅男子,日前被拍下喺港鐵車廂內輕吻海報中嘅女藝人湯洛雯。