【短片】【爆相爆片】陪凸肚李家誠出遊 索媽徐子淇希臘Bra Top大解放

現年35歲嘅徐子淇模特兒兼演員出身,自然影過唔少泳衣同性感靚相,不過自從06年嫁俾四叔李兆基細仔李家誠成為「千億新抱」,到翌年大女晞兒(Hayley)出世,更加惜肉如金。不經不覺徐子淇入門12年,先後誕下兩子兩女,大女晞彤都已經11歲,細仔建熹都已經2歲,亦鮮見子淇有性感打扮。其實子淇身形一直保持得非常好,早排佢同老公去咗希臘度假,同行仲有李家誠老死、李國寶細仔李民斌兩公婆。有本報讀者陳先生就影到子淇着住Bra Top嘅影片,透過「爆相爆片」分享。

陳先生話日前喺希臘嘅藍白小島聖托里尼(Santorini)見到徐子淇兩公婆,同行嘅仲有另一對夫婦同小朋友一行7人,陳先生話:「條片個時間係香港時間,希臘慢5個鐘,即係大概當地6點。嗰邊日照好長,9點先天黑,6點係開始準備睇日落,相信佢哋都係去嗰度睇。」陳先生話遲過徐子淇一班人到,一去到就認出對方,佢話:「佢套衫嘅顏色真係幾搶眼,同埋嗰段時間唔係好多遊客,特別係華人。」

之後徐子淇一行人先過陳先生離開,佢又透露嗰度係碼頭,一行人如果要上番大街,有幾種選擇,搭䌫車、騎驢仔或者行好多級樓梯。從讀者提供嘅片段見到,同行嘅夫婦應該係李家誠老友、李國寶細仔李民斌同太太馮靈針,可能當地陽光猛烈,兩位女士都戴住闊邊帽。不過講到性感馮靈針嘅露肩裝就唔及子淇嘅Bra Top。咪睇佢已經生咗4名小朋友,依然保持到做模特兒時嘅身形。而且對鏡頭嘅敏感度不減當年喺娛樂圈,照片所見當子淇轉身發現有人影相時,已經金睛火眼全程睇實,果然訓練有素。

聖托里尼小島除咗喺希臘睇日落嘅勝地,當地嘅藍白小屋亦係遊客必睇嘅景點,而藍白小屋嘅典故,係因為當年希臘俾奧圖曼帝國統治時,禁止懸掛希臘國旗,而島上居民就將屋鬆成藍白兩色,同國旗色一樣,以宣示民族主義。島上有一座火山,每年8月25號就會舉行火山節(Ifestia Festival)放煙花,提醒島民自己住喺火山上面。

精選娛聞,喺晒《娛果》
http://fb.com/appledailyent
徐子淇同老公李家誠一齊去希臘旅行,火辣辣bra top真係引死人。(讀者提供圖片) 相對老婆徐子淇嘅fit,老公嘅李家誠係時候考慮減肥。(讀者提供圖片) 同行嘅仲有李民斌夫婦。(讀者提供圖片) 陽光猛烈兩位女士都戴上闊邊帽,但論性感子淇稍勝一籌。(讀者提供圖片) 聖托里尼小島喺希臘睇日落同藍色小屋勝地。(讀者提供圖片) 位處火山嘅聖托里尼小島,每年更會舉行「火山節」。(資料圖片) 徐子淇大喺2015年為李家再添一子。(ig圖片) (ig圖片) 結婚12年一樣咁恩愛。 (ig圖片) 四位小朋友,真係大家庭。(ig圖片)