【短片】【吸血釣魚機●二】Online打釣魚機熱爆 電子貨幣交易避冚檔

換錢賭博遊戲手機app近年攻陷年青人!《蘋果》發現,在社交網站facebook充斥大量賭博手機app的廣告,玩家只需以支付寶、微信支付等方式支付100元即可開戶並獲200積分,登入賭博手機app即可玩逾30多款遊戲如釣魚機、老虎機等,玩家最後可將贏到的積分同樣以支付寶等方式換成現金。警方發言人稱,不時會進行網上巡邏,如發現違法行為於香港境內發生,會進行調查及採取適當執法行動。

「我每日都玩10幾小時,貪佢唔使出街,唔使搭車搭船去機舖過大海。」從事運輸業的30多歲王先生,一年多前在facebook見到相關廣告,不少代理人留下WhatsApp電話,又展示大量玩家贏錢的過數紀錄,令他心癢癢聯絡網上的代理人,再透過TnG、O!ePay、微信支付、支付寶等方式,「支付100元即可開戶,之後佢(代理人)會畀個登入密碼,我再下載佢嘅手機app就可玩。」

記者發現,網上相關廣告以「joker」和「3win8」兩款線上博彩遊戲APP最熱門,記者嘗試下載app,發現內有逾30款遊戲,包羅萬有,如釣魚機、老虎機、百家樂、跑馬等。「用積分玩,如贏100分,即係贏到200蚊,可以WhatsApp代理人,叫佢以電子錢包畀錢你。」而且這些賭博app也不時大搞噱頭,如介紹朋友開戶可獲20分,又不定期在facebook舉行抽獎活動,送出iPhone等名貴禮物。

不過,王先生愈玩愈覺得不對路,「玩咗1個多月,我贏咗300蚊,叫代理人畀錢,但佢以不同藉口拖延,咁我繼續玩,結果輸光這300蚊,之後我再找其他代理人開戶,佢哋也是如此,分就識扣,贏咗就唔畀錢。」他總計過去一年多,僅贏過數百元,卻輸了2萬多元,「最甘一次係玩釣魚機,一小時便輸掉5,000至6,000元。」

他形容,這些遊戲起初他只是打發時間,但愈玩就愈有刺激感,「因為可以換錢,所以個心就好似賭緊錢。」但當他經歷10多次代理人不退錢後,便開始醒覺,其實只是吸引用戶不停入錢而已,「呢啲 app係電子嘢,有人控制,係呃人嘅。」他現時已戒掉此遊戲2個多月,「開初也想再玩,但一想到呃人就決心戒掉,他更指有朋友沉迷下去,輸掉成間茶餐廳,慨嘆這些賭博app害人不淺,「呢啲app免費,只要一個帳戶就可登入,但其實同賭外圍差唔多,等同地下賭場,但佢哋做到很廣泛,在facebook大賣廣告,十分猖狂。」他建議政府應立法監管。

有內地代理釣魚機的商戶指出,透過網上玩釣魚機,香港警方根本難以追查,因為伺服器都東南亞,跟賭波網做法相似。如要成為代理人,必須先找後台(即網絡公司),然後自資買分,對方便給予一個二維碼(QR Code)及戶口,再自行找客人,雙方透過微信支付、支付寶、微信紅包等方式交收賭款,但網絡公司可查旗下客戶輸贏的賬戶。不過,近年內地加強執法,她不諱言:「(內地)網警查得很嚴,用IP查,最近有12間網絡遊戲公司被捉,實體查得無咁嚴。」

記者:張軍、郭美華

你敢爆,我敢獎! 即Call《蘋果》24小時爆相爆片熱線63836568
王先生稱玩網上釣魚機,只有不斷入錢,但贏錢後代理人卻拖延過數。 王先生表示,除了釣魚機,網上還有多款遊戲均有賭博成份。