【短片】【爆相爆片】兩男玩命危站希慎16樓走火層 目擊者:嚇到個心離一離

【02:02更新:新增動新聞】
讀者楊先生噚日(8號)下晝5點幾,喺銅鑼灣登龍街嘅寫字樓返工,其間突然見到隔咗兩條街、樓高40層嘅希慎廣場中層位置,有一個着粉紅色衫嘅男仔,企喺平台邊緣,佢背向街,舉起單手唔知做乜,楊先生初時仲以為佢想跳樓,嚇到個心都離一離。

再睇定啲,廿幾秒之後嗰個男仔就放低手,然後企咗一陣,又再行近邊緣,當時都幾大風,件粉紅色衫隨風飄揚,楊先生覺得好牙煙,猶疑緊使唔使報警,其間佢聽到有警車響聲,但唔知係唔係去緊嗰度,好彩冇幾耐個男仔坐低咗,楊先生先鬆一口氣,仲話如果佢真係跳落嚟都唔知點算。

話口未完,粉紅衫男仔又走出啲,今次直頭坐喺平台邊,面向街,兩腳條條揈,然後仲多咗個男仔出現,好似拎住部手機幫粉紅色衫男仔影相。楊先生覺得影相唔使咁搏吓嘛,咁樣好危險!講開跳樓,佢個女同事喺旁邊亦不吐不快:「做乜要揀咁多人嘅地方嚟跳呢,陣間又塞車封路,人死有好多方法啫,跳樓死跌落嚟一pat嘢甩頭甩髻核突到死,你話我涼薄都係咁話!」唔知呢位女同事係唔係鍾意用激漲法嘅呢!最後兩個男仔喺楊先生視線範圍消失咗。

希慎廣場喺2012年8月10號開幕,商場部份合共17層。希慎發言人話,嗰兩個男仔身處嘅位置係希慎廣場16樓嘅走火層,佢哋喺未經授權嘅情況下蓄意打開上咗鎖嘅走火門,走咗入去唔係開放俾公眾嘅地方,做出啲唔適當嘅行為。由於事件涉及擅闖私人地方,有關部門已經報警處理。

有人為咗打卡可以去到好盡,電影《志明與春嬌》而爆紅嘅九龍灣一條行人天橋,被稱為「志明橋」,嚿年年頭吸引咗好多少男少女去打卡,有人為影靚相爬上3層樓高橋頂或者危坐天橋窗邊,搞到消防員頻頻出動,有消防員忍唔住喺fb貼文,呼籲巿民唔去再冒險去影相添。

講開又講,近年rooftopping喺全球流行,即係極限攝影,拍攝者會潛入高樓大廈嘅天台,喺邊緣做出驚險動作嚟影相,簡直係玩命。資料顯示,呢種極限攝影大約11年前左右喺俄羅斯同烏克蘭興起,兩年前更加有俄羅斯人嚟香港挑戰唔同建築物,貪香港建築密度高。嚿年網上亦都流傳短片,相信喺中環一帶用航拍影嘅,片中一位俄羅斯金髮女同型男,企喺地盤內嘅一架紅色吊機上面額貼額,背景見到ifc等建築物同埋維港景色,加上好多幢大廈都喺兩人腳下,有晒構圖。有「國內極限第一牛人」之稱嘅26歲網紅吳詠寧,嚿年11月8日在長沙一高樓天台拍攝意外跌死,一度成為網上熱話。

雖然挑戰極限好刺激、影到靚相吸引人又滿足自己,但都係奉勸一句,命仔緊要,而且非法闖入私人地方,分分鐘要負上法律責任㗎!
兩名男子闖入希慎廣場16樓走火層,其中一人更站在平台邊緣,舉起單手。(讀者提供)