【短片】【爆相爆片】黃巴司機vs站頭女職員 嘈交嘈到要阿sir調停

正所謂「你有壓力我有壓力」,特別係要捱更抵夜工作嘅人,更加容易做到心火盛,好似落馬洲管制站嘅「黃巴」司機同車站職員咁,嘈到要阿sir調停,最終仲要乘客換車,煩到其他人,真係唔多好囉!

讀者郭小姐一家大細返完大陸玩,喺今日凌晨1點幾經落馬洲返香港,一行5人包括一個只有幾歲大嘅小朋友,由於已經夜深,過咗境嘅旅客個個都好想快啲返屋企,一見黃巴士當然即刻上車,但郭小姐話,巴士一開門,司機就即刻怒氣沖沖咁衝落車,初時大家都無為意照上車,但等極司機都未上返嚟,仲聽到爭執聲,「聽到嘭一聲,仲有個女人大叫!」原來司機同站頭嘅女職員嘈起上嚟,女職員話「我有call上台」、「我唔可以成世咁畀你屈。」郭小姐聽佢哋嘅對話內容,估計佢哋因為工作嘅事而嘈交,就咁嘈咗幾分鐘,有乘客開始鼓譟,大叫司機上返車,「好男不與女鬥」。

呢個時候,司機上返車,但女職員亦跟埋上車繼續嘈,仲想喊咁款,無耐就有3個阿sir到場勸交,由於雙方都非常激動,司機仲企咗起身想打人咁款,阿sir即刻喝止,而個女職員就由另一名女同事拉落車。

「佢就算開車我都唔敢坐,容乜易好似大埔(九巴車禍)嗰單咁㗎!」郭小姐恐防巴士司機情緒受影響,於是改搭另一班黃巴離開。


你敢爆,我敢獎! 即Call《蘋果》24小時爆相爆片熱線63836568

落馬洲管制站嘅「黃巴」司機同車站職員咁,嘈到要阿sir調停,最終仲要乘客換車。(讀者提供)