【短片】【爆相爆片】吳若希抱女企街躁底爆了 有米老公頭耷耷冇聲出

26歲人妻吳若希(Jinny)奉女成婚,去年10月同澳門闊少何兆鴻(Alex)拉埋天窗,寶貝女Giselle話咁快已經1歲,Jinny不時喺社交網晒老公與「前世情人」相片扮呻醋,一家三口樂也融融。不過,日前佢哋到灣仔食完茶記離去,被讀者陸小姐透過「爆相爆片」分享,直擊Jinny躁底爆老公嘅過程。

當日大約早上11點幾,讀者陸小姐在灣仔蘇記茶餐廳門外,發現Jinny一家三口:「我喺對面街,見到佢哋行出嚟,最初係被佢哋嘅情侶鞋吸引,再望上去先知道係佢哋。」孭Chanel手袋嘅Jinny似闊太,孖老公着Valentino情侶波鞋放閃,兩公婆應該食完早兼午餐離去,企喺街上等司機駕車接載。

當時Jinny雙手抱住1歲囡囡,陸小姐表示:「佢抱得好衰,囡囡pat pat墮晒落嚟,雖然我唔係媽咪,但明眼人都見到佢抱得唔好。佢老公冇幫手抱女,我見到吳若希有啲躁,鬧咗老公兩句,好晦氣咁指手畫腳,我企喺對面街,都聽到佢好似講:『應該等埋先啦!』似乎係話應該等司機車到咗先行出嚟,因為嗰日都幾熱,企喺條街都辛苦。」

從讀者提供相片所見,小公主Giselle瞓咗覺,Jinny似乎唔係好夠力抱囡囡,所以Giselle都墮到有啲低,不過見Jinny雙手箍實囡囡,保護十足,而Alex就兩手攞住購物袋兼背囊,不停撳電話似催促司機,問到Alex被老婆埋怨有乜反應?陸小姐話:「佢老公頭耷耷冇出聲,之後唔知係咪發現我影相,佢哋行前咗少少,好似等咗五、六分鐘司機才到。」

精選娛聞,喺晒《娛果》
http://fb.com/appledailyent
吳若希當街躁爆老公 有米老公頭耷耷冇聲出。(讀者提供圖片) 吳若希似乎唔夠力抱囡囡。(讀者提供圖片) 平時一家三口樂也融融。(ig圖片) 有時吳若希扮呻醋。(ig圖片)