【短片】【爆相爆片】上錯巴士又如何! 師奶洪荒之力強開車門行嚇壞車長

搭錯車可能大家都試過,但你有冇勇氣叫停司機畀你落車?粉嶺一位顧家師奶星期二朝早搭錯車,巴士已經駛上高速公路,但為咗趕返屋企照顧小朋友,佢勇敢到嘗試拉開巴士車門,巴士車長嚇到馬上停車,最終師奶夾硬拉開車門落車,徒步離開。

住粉嶺聯和墟嘅徐小姐表示,星期二朝早8點正乘搭由聯和墟總站開出嘅九巴277X線,一位約50歲的師奶喺祥華邨上車。一輪上客後,巴士準備駛上高速公路,呢個時候師奶發現唔對路,原來佢係短途客打算喺華明邨落車,但無留意到8點前班次唔經華明邨,於是要求司機俾佢落車。

徐小姐指師奶一開始有誤會,不斷抱怨司機巴士改道冇通知,要求停車,但司機拒絕並馬上指正佢冇留意班次,師奶知道後馬上改變態度話係自己錯,但華明邨屋企有細路要湊,不斷司機講「伯伯,求下你畀我落車」,不過司機基於安全始終無答應。

於是師奶再改策略,嘗試拉開車門落車,徐小姐指車上一男一女乘客即刻上前喝止師奶,男乘客大喊「你唔好咁拉啦」,女乘客勸司機開門畀師奶落車,呢個時候巴士已駛上高速公路近大學站,司機惟有停車但堅持唔肯開門。最終師奶情緒激動之下,以洪荒之力拉開前車門,徒步瀟灑走向大學站方向。

徐小姐話每朝返工都搭同一路線嘅巴士,以往見過唔少人搭錯車,去到大老山隧道先搭倒頭車,今次係第一次見到有人係公路上強行拉開巴士車門,要求落車。徐小姐直言當時覺得「好恐怖,驚佢死」,全車人都眼定定觀望。結果司機同乘客講唔好意思後,巴士繼續行程,延誤大約10分鐘。

你敢爆,我敢獎! 即Call《蘋果》24小時爆相爆片熱線63836568