【短片】【爆相爆片】醉酒佬大鬧灣仔 坐的士頭冚踩玻璃

的哥噚晚(10號)駛經灣仔道停燈位,點知遇着3隻印度醉貓,喺雙黃線夾硬要上的士,司機唔肯開門,話晒今個月1號起喺限制區上落客,畀人捉到嘅話,張牛肉乾加到560蚊㗎嘛。3隻醉貓上唔到車發爛渣踢車門,其中一人擒上的士車頂踩爛個燈箱。

跟住佢失平衡由車頂跌落地,起番身又爬上車頭冚,摩打腳咁踢到的士大銀幕變蜘蛛網,另一個就坐喺的士前面馬路唔畀佢開車。路過嘅同鄉李先生影低晒佢哋嘅惡行,話的哥一直喺車入面打電話,相信佢報警。

雖然係同鄉,但李先生大義凜然咁話同鄉飲醉酒失晒控唔啱,「香港有法律,唔應該毀壞的士,用咁暴力嘅方法!好心痛,我哋係土生土長,應該貢獻社會,想做一個好形象畀香港,當呢個係自己個家……你一個南亞裔做呢啲行為,全世界就會覺得個個都係一樣!」

警方證實,噚晚9點幾,灣仔天樂里同灣仔道交界,一名南亞漢偕兩友人想坐上的士,但的士冚咗旗,佢跳上的士、拍打的士又打爛車窗,57歲姓曹的士司機報警,警察到場拉咗一個48歲南亞漢,涉嫌刑毀。的哥同阿sir講,喺燈位之前嗰3個人曾經走出馬路攔截佢架車,佢已經扭軚避開,但佢哋仲追上嚟,強調冇冚旗。

你敢爆,我敢獎! 即Call《蘋果》24小時爆相爆片熱線63836568
3醉男於雙黃線截停的士被拒載後,涉嫌刑毀的士。(讀者李先生提供)