【短片】【爆相爆片】鍊贏華姐冠軍?林欣彤緊身Tee約會天堂鳥Tyrese

27歲嘅林欣彤(Mag)外表清純,但近日卻被指係「最強小三」,暗交2017年華姐冠軍余思霆男友、即MK組合天堂鳥成員歐鎮源(Tyrese)。事後Mag同Tyrese均稱對方係好朋友;而余思霆亦表示信任男友,唔會呷醋。

不過,《蘋果》讀者Cecilia日前透過「爆相爆片」,表示上周五晚上九點幾,喺元朗吉野家見到Mag同Tyrese拍拖。Mag一身戰鬥格,穿上緊身T襯超短熱褲,全程對Tyrese服侍周到。Cecilia話:「我見林欣彤同個男仔拖住手入嚟,起初都唔認得,因為林欣彤係戴住口罩,後來佢哋買完嘢,都係林欣彤負責攞嘢食。」

讀者Cecilia話Mag同Tyrese全程有講有笑,Mag笑得特別大聲,而且個樣好冧。Tyrese食完自己個餐,仲幫Mag食埋佢食剩嘅火鍋配料。Cecilia話:「見個男仔係咁撩牙,完全不顧儀態,佢哋食完之後仲兩個人用一把雨傘走。」睇嚟真係好sweet!

林欣彤否認有拖手,噚日接受傳媒訪問時話﹕「真係唔係一齊,我哋係有食飯,有時係成班朋友。(有冇拖手?)冇,讀者睇錯。(怕唔怕Tyrese女友誤會?)真係唔係有嘢。(同Tyrese有冇發展可能?)唔會,係朋友。」而Tylrese亦否認一腳踏兩船,佢話:「梗係冇,又邊個咁大整蠱?同朋友食飯真係好正常,唔係男就係女,咁叫佢拎相出嚟睇下影咗咩相?!總之我真係冇做過,唔好意思。(會唔會陪多啲女友?)呢排佢真係好忙,我都想見佢多啲。」

Mag入行多年,除承認與羅孝勇拍拖外,其感情世界都好複雜。Mag早前宣傳新歌《忍》時,就自爆曾經喺不知情下做咗第三者,最後難忍三角關係,抽身離開。而過去亦有傳Mag當年與圈外男友拍拖時,又搭上天堂鳥另一成員葉灝基(Gordon),引發被圈外男友「家暴」。(相關新聞﹕https://bit.ly/2kUr5pb)

精選娛聞,喺晒《娛果》
http://fb.com/appledailyent
林欣彤被影到同天堂鳥Tyrese拍拖,緊身T襯超短熱褲,勁冧!(圖片由讀者提供) 林欣彤全程笑得好大聲。(讀者提供圖片) Tyrese當眾擘大口撩牙,雖然不顧儀態,但林欣彤似乎好受落。 (讀者提供圖片) 林欣彤自己出去配調味料,唔使Tyrese服侍。(讀者提供圖片) 林欣彤唔使去高級餐廳,吉野家都食得好開心。 (讀者提供圖片) 林欣彤起初都怕被人認出,食嘢前都係戴住口罩。(讀者提供圖片) HotCha早前開演唱會,林欣彤同Tyrese一齊睇騷,中間夾住馮允謙。(ig圖片) 余思霆係2017年華姐冠軍,樣靚身材好,曾公開承認與天堂鳥成員Tyrese拍拖。