【短片】【爆相爆片】孖男友原宿行街 蘇麗珊聞廣東話即彈開

今年應該係蘇麗珊豐收一年,今個農曆年3套賀歲片《我的情敵女婿》、《西遊記女兒國》、《棟篤特工》都有佢份演出。至於感情方面同圈外ABC男友感情穩定,人前入後都非常恩愛。去年底就試過被《蘋果》讀者透過「爆相爆片」,影到男友當街搓蘇麗珊個肚(新聞連結: https://bit.ly/2L1oLss )。

不經不覺小倆口拍拖已經18個月,早兩日蘇麗珊係Instagram自爆去咗東京,貼咗張喺築地嘅相,仲對玉子燒着迷「這個玉子燒讓我完全瘋狂了,我愛築地玉子燒、我愛築地玉子燒、我愛築地玉子燒」,重要嘅事講3次,不過冇提到ABC男友有冇同行。

不過嚟到東京呢啲港人旅遊地方,又點會冇人見到。《蘋果》讀者陳小姐就透過「爆相爆片」影到蘇麗珊同男友喺原宿行街。

爆料人陳小姐話:「星期日(13日)下晝4點幾,我同班朋友喺原宿hands be & cafe食嘢,見到蘇麗珊同佢位圈外男友行緊hands be嘅文具店。本來都冇咁留意,因為蘇麗珊戴咗頂帽、短頭髮望落成個文青look,望多兩眼先認得佢。我哋仲專登上望睇下個男仔係咪拍開嗰個男朋友,真係佢,所以冇認錯。」

據陳小姐形容當時蘇麗珊同男友貼實行,不時四目交投卿卿我我,陳小姐話:「喺文具店佢哋好好傾,仲成日攞住啲文具研究,其間唔知個男仔講咗啲乜嘢,o氹到蘇麗珊笑得好開心。」陳小姐班朋友越睇越開心,用廣東話交談,蘇麗珊同男友一聽到有人講廣東話,就即刻好警覺自動彈開,跟住就消失喺人群當中。

精選娛聞,喺晒《娛果》
http://fb.com/appledailyent
(讀者陳小姐提供圖片) 蘇麗珊同男友係原宿行街(讀者陳小姐提供圖片) 爆料者形容佢哋細聲講大聲笑(讀者陳小姐提供圖片) 一身文青look嘅蘇麗珊攞起啲文具研究(讀者陳小姐提供圖片) (讀者陳小姐提供圖片) 聽見有人講廣東話,蘇麗珊同男友即刻彈開。(讀者陳小姐提供圖片) 陳小姐話其實hands be入面都好多香港人。(讀者陳小姐提供圖片) 蘇麗珊對手上玉子燒愛不惜手(Ig圖片) 唔知揸機影相嘅係咪就係蘇麗珊位男友。(Ig圖片)