【短片】【爆相爆片】靚靚老婆親力親為買餸 陸永:太太最拿手係煲湯

陸永嘅索爆老婆Reina喺社交網好紅,雖然佢唔係圈中人,Instagram都有137k嘅followers,日前Reina單拖現身街市買餸,就被佢其中一位follower認出,透過「爆相爆片」分享索太真身。

讀者金小姐接受《蘋果》電話訪問表示:「嗰日黃昏6點鐘,喺坑口厚德街市見到陸永老婆,佢一個人嚟買餸,傾住電話好開心。」問到點解會認出陸永老婆?金小姐話:「初頭留意到一個女仔把聲咁斯文咁靚女,望一望咁似陸永老婆,因為我有follow佢ig,覺得佢兩個囡囡好得意。初時都唔肯定係佢,後來睇番佢嗰日嘅ig,見佢都係着呢條牛仔褲,仲留言話啱啱喺街市踩屎。」

金小姐讚陸永老婆真人幾靚女:「街市有個咁靚嘅女人,所以望多佢兩眼,但冇乜人認到佢,全部都係上年紀嘅人。」記者睇番Reina嘅ig,原來佢嗰日買完餸踩屎,留言:「上車前以為身邊有人放屁,上車閂晒門仲聞到陣味,先知道原來係踩屎... 鞋都唔要,餸都唔買,即刻兜返屋企,叫陸生拎定對鞋畀我著,叫工人準備定1:10消毒藥水消毒#乜屎可以咁臭#成朝眼眉跳原來係警告我小心踩屎!」

陸永對於靚靚老婆被「爆相爆片」,佢喺電話表示:「咁大鑊!」問到老婆煮餸手勢得唔得?陸永話:「ok啦,佢唔係一定自己煮,但一定自己買餸囉。我從來唔識煮嘢,一係太太煮,一係工人姐姐煮,太太最拿手反而係煲湯,湯水緊要,所有滋補嘅湯,補吓身養吓聲。」

至於讀者讚老婆靚女,係咪好開心有人欣賞太太呢?陸永就話:「ok嘅,我欣賞得嘞啦,唔使太多人欣賞。」好嘢留番畀自己?「係呀。」問到覺得老婆最大吸引力係乜?陸永冧爆話:「好好,好女人,湊得兩個小朋友開心,湊得我又開心。」問到會唔會鼓勵老婆做KOL?陸永表示:「佢做緊㗎啦,我諗冇定義喎,上網隨時都可以係,唔使攞正牌。」

ig有咁多支持者,Reina當然都有花啲功夫啦,最近佢就不時上載咗囡囡嘅片,發現原來佢大女陸一穎(Hannah),突然對昆蟲好有興趣,Reina仲拍咗一條片,當時Hannah就同陸永一齊研究昆蟲,Reina留言話:「日日同人研究啲昆蟲,又要我捉屋企條四腳爬爬畀佢,佢要同四腳爬爬傾偈...」Hannah竟然想同四腳爬爬傾偈,佢嘅勇氣真係可嘉,但相信有啲朋友就會滴晒汗,大表怕怕囉!

精選娛聞,喺晒《娛果》
http://fb.com/appledailyent
有讀者日前見到陸永老婆Reina喺坑口厚德街市買餸。 Reina買餸其間不時都會睇電話。(讀者提供圖片) (讀者提供圖片) (讀者提供圖片) 陸永一家四口。(ig圖片) 陸永嘅索爆老婆Reina(ig圖片)