【短片】【爆相爆片】父母安排相睇?林峯掟公仔o氹「翻版千語」開心

林峯曾經「七愛」千語BB,但拍拖5年都未結婚,去年頻傳兩人已經分手。(相關新聞: http://bit.ly/2kaxlIJ )噚日讀者任小姐透過《蘋果》爆相爆片,表示中午12點左右,喺海洋公園嘅香港老大街遇見林峯一家三口,同行仲有一對男女,及一名20餘歲,身材高䠷、樣貌標緻嘅索女。

林峯為免被人認出,都將自己包到實,全程戴住黑色口罩、黑框眼鏡同cap帽,普通一件黑色運動外套加牛仔褲,打扮得好低調。任小姐話:「見到林峯同個女仔一齊去掟公仔,林峯好犀利,一掟就中咗個Peppa Pig,然後就送咗俾個女仔,個女仔當然好興奮啦。」個女仔身高、外型與吳千語都有幾分相似,同樣喜歡all back束馬尾,任小姐話:「個女仔好高㗎,成個「翻版千語」咁款,又瘦又靚,聽見佢講普通話,問林峯要唔要食魚蛋,之後見林峯攞咗嚟食,佢哋share一盒。」

雖然沿途都冇人認得出林峯,但林峯都表現得好避忌,與高䠷新歡保持一段距離。期間「翻版千語」行行吓仲同林峯所贈嘅Peppa Pig嘟嘴自拍,似乎好鍾意。之後一行六人坐纜車過咗去動感天地玩機動遊戲,傍晚近5時,任小時同林峯等人再喺回程嘅纜車站相遇,睇嚟真係玩得好盡興。

38歲嘅林峯同吳千語年齡相差14年,有指林峯一直好愛千語BB,但有傳廈門李嘉誠爸爸林華國就唔太buy呢位準新抱,覺得唔係門當戶對。今次一齊去玩,「翻版千語」似乎係林爸爸認可嘅相睇對象,唔知係咪父母特意安排俾林峯一個相睇機會,等乖仔可以識多個朋友呢?!

精選娛聞,喺晒《娛果》
http://fb.com/appledailyent
林峯與高䠷新歡都幾好傾,林峯仲掟中咗一隻公仔送俾女方。 (讀者提供圖片) 林峯全程都戴住口罩,陪爸爸(右二)及女友人一齊去海洋公園。(讀者提供圖片) 林峯ig都有同款眼鏡。(讀者提供圖片) 有圖有真相(ig圖片) 高䠷新歡拎住戰利品自拍。(讀者提供圖片) (讀者提供圖片) 高䠷新歡似乎氹得林峯父母好開心,沿途有傾有講。(讀者提供圖片) 林峯與吳千語去年頻傳分手。(資料圖片) 有指林爸爸一直唔buy千語呢位未來新抱。(資料圖片) 林峯着住呢條牛仔褲去會佳人。(ig圖片)