【短片】【爆相爆片】偕女伴去圓方睇戲 薛世恒:盡地主之誼

陳法拉前夫兼Neway大少薛世恒喺舊年突然棄商從演,膽粗粗走去做新人加入娛樂圈,薛世恒仲簽咗一間北京嘅經理人公司,主力喺電影同電視發展。回復單身嘅陳法拉,唔單止喺事業上有新發展,連戀情方面亦都有着落,有消息稱去咗紐約生活嘅法拉,秘交前法國駐日外交官(新聞連結: http://bit.ly/2FLX7vT )。

反而薛世恒嘅戀情唔似有着落,暫時都聽到係講工作嘅嘢,好少講感情事。之不過事情可能有啲轉變,日前有《蘋果》讀者陳小姐,佢喺圓方捕獲薛世恒,仲透過「爆相爆片」公開相片,當時薛世恒身邊有女伴,陳小姐話:「嗰晚喺圓方嘅戲院見到大少(薛世恒)同一個女仔喺度買飛睇戲,女方警覺性好高,買飛嗰陣周圍望,個身又轉嚟轉去,直到大少買完飛之後,佢哋邊行邊笑咁去洗手間嗰邊,準備入戲院睇戲。」

陳小姐話薛世恒全程都好有紳士風度,除咗行緊嗰陣,彎低身聽嗰個女仔講嘢,之後去完洗手間,佢坐喺洗手間門口,等咗個女仔差唔多有10分鐘,跟住先一齊行入戲院。

《蘋果》事後向薛世恒了解,身在大陸嘅佢透過經理人否認有新戀情,仲話:「嗰個唔係女朋友,而係大陸劇組一齊做嘢嘅工作人員,佢嚟到香港,就一盡地主之誼,唔會係有得發展嗰種。」再問薛世恒o依家有冇拍拖?佢話:「冇時間呀,嚟緊3月會開拍一套香港電影,仲係男主角,第一次正式拍戲,好大挑戰,做好工作先諗拍拖。」

最港電影大獎投票網址
http://bit.ly/thekongestfilmawards

精選娛聞,喺晒《娛果》
http://fb.com/appledailyent
讀者話見到薛世恒同女友人去咗睇戲。(讀者提供圖片) 薛世恒話呢個女仔只係工作同事,並唔係女友。(讀者提供圖片) 讀者讚薛世恒有紳士風度。(讀者提供圖片) (讀者提供圖片) (資料圖片) 陳法拉回復單身之後,好快有新戀情。(資料圖片)