遊澳洲同亨亨行機場免稅店
李嘉欣容光煥發惹人望

■李嘉欣同老公許晉亨喺機場行免稅店,睇得非常入神。讀者提供圖片 【爆相爆片】李嘉欣同老公許晉亨、囝囝許建彤(Jayden Max)經常一家三口齊齊去旅行享受家庭樂,尤其係去日本旅行,估計已經成為嘉欣最愛,間唔中就見佢喺Ig貼出去日本玩嘅旅遊相,不過最近佢哋一家三口就揀咗去澳洲度假。

《蘋果》讀者李小姐日前透過「爆相爆片」,分享喺澳洲機場巧遇嘉欣同老公許晉亨逛免稅店嘅相片。李小姐爆料指,當日澳洲時間晚上近8點,見到李嘉欣同老公喺澳洲機場入面嘅免稅店周圍逛:「因為見到有兩個人熟口熟面,而且發現女嘅好亮麗耀眼,所以就好奇望多幾眼,睇真啲就見到係李嘉欣同許晉亨。」

■噚日係母親節,李嘉欣貼出同囝囝嘅合照慶祝。互聯網圖片 ■李嘉欣早前就已經喺Ig貼過囝囝Jayden學騎馬嘅相。互聯網圖片

睇美容用品
據李小姐形容,當時嘉欣同許晉亨停留喺一個美容專櫃前好入神左揀右揀,但現場就見唔到囝囝Jayden嘅蹤影,李小姐因為趕時間離開,所以唔知道佢哋最終有冇買到心頭好。

其實,嘉欣日前都有喺Ig story post過囝囝身處原野嘅騎馬相,仲有張化咗淡妝嘅自拍照,寫住「Happy Trip」,估計嘉欣此行應係同老公帶埋個仔一齊去澳洲玩。另外,噚日嘉欣喺Ig貼出同囝囝Jayden玩得好開心嘅合照,並寫上「Happy mother's day」,慶祝母親節。