大肚胃口好甜鹹通殺
陳少霞食拔絲蓮子攞意頭

【爆相爆片】現年42歲嘅陳少霞目前懷有身孕,預產期約今年6月。本報讀者陳小姐日前透過嘅「爆相爆片」,分享陀B中嘅陳少霞同老公李文輝及家人、七大一細喺尖沙嘴一間平民化酒樓食飯。陳小姐日前接受訪問時話:「陳少霞當日化咗淡妝,皮膚好白同好靚,佢全程坐低,所以未見到佢個肚幾大,現場見佢同老公好好傾,老公又夾餸畀佢,陳少霞胃口唔錯,食咗好多嘢。」陳小姐仲留意到李文輝好留心聽長輩說話,佢哋點咗「拔絲蓮子」作為甜品,由侍應攞到枱上炮製。相信點呢味甜品除咗好食之外,「蓮子」仲有連生貴子嘅意頭。 ■陳少霞當日胃口幾好。讀者提供圖片

跟前夫有兩女
陳少霞人生高低起跌頗大,17歲演出張艾嘉監製嘅電影《哥哥的情人》出道,之後同劉德華喺電影《天與地》中合演夫妻。24歲時嫁澳洲籍華裔商人,退出娛樂圈,婚後育有兩女。可惜婚姻維持唔夠八年。離婚後陳少霞跌入人生谷底,16年同61歲「法拉利之父」李文輝再婚。一直想有BB,可惜前年不幸經歷小產,大受打擊下夫婦接受醫生建議人工受孕,可惜都唔成功,不過去年底宣佈自然懷孕成功。