■女乘客嘗試替輪椅婦(箭嘴示)扣安全帶遭喝止。

爆相爆片:輪椅婦搭九巴唔扣安全帶

交通意外時有發生,乘客乖乖扣上安全帶嘅話,真係隨時保返條命仔,雖然巴士唔係每個位都有安全帶,但輪椅使用者上車後,就一定要扣,偏偏仲係有人唔聽話,司機勸唔聽,就算其他乘客想幫手,仲俾佢鬧返轉頭!

司機為安全拒開車
話說前晚(9日)約10點,讀者馮先生喺屯門市中心巴士總站等巴士,見到一架960九巴停咗喺咗,明明成車人,但司機又唔見咗,好奇上車八吓,發現車廂內原來好熱鬧,司機好無奈咁企咗喺度,身邊仲有幾個乘客食緊花生,原來有個坐輪椅嘅婆婆上咗車之後唔肯扣安全帶,司機勸極都唔聽,為咗安全起見,司機唔開車,結果成車人喺車內呆等。

片段中,左手邊一位男乘客等到躁躁哋,大聲喝令個婆婆:「爽手啦!唔好搞咁多嘢啦!」點知阿婆唔理不特止,仲反駁:「你收嗲啦!」「我怕你呀?大聲就得?報警吖笨!」中氣十足。

旁邊一位中年女士為咗息事寧人,主動走埋婆婆度想幫佢扣安全帶,點知阿婆一手捉住位女士,「放手呀!我唔識扣呀!」被喝止嘅女士愕咗兩秒,唉!真係好心着雷劈。馮先生認為,鬧老人家雖然唔啱,但阿婆令成車人返唔到屋企,真係好自私。「司機應該趕佢落車,冇理由因為佢阻住成車人!」

其實,根據貼喺車廂內嘅安全指引,除要求輪椅須面向車尾及扣安全帶,旁邊嘅束縛帶亦應該穿過輪椅扶手扣好索緊,做足以上步驟,可以固定輪椅,避免意外發生。