爆相爆片:肥仔疑遭家法伺候毆pat pat

■白衫金毛青年手持木棍,準備毆打被逼埋牆的黑衫胖青年。 噚日凌晨零時左右,住喺荃灣福來邨嘅鄧先生,聽到永嘉樓對開傳嚟好嘈嘅噼哩啪啦聲,於是佢望出街睇吓乜事,見到有個金毛仔用木棍毆打另一個青年嘅pat pat,但被打嗰個青年似乎完全冇反抗,企定定畀人打,鄧先生覺得好似一幫人內訌,家法伺候咁。

現場係永嘉樓對開錶位停車場行人路,鄧先生見到一個着黑衫肥肥哋嘅青年俾人逼埋牆,一個着白衫金毛仔攞住支木棍,佢後面前後有五個黑衫青年好似睇水咁。鄧先生聽唔清楚佢哋嘈乜嘢,只係間中聽到有人呼喝肥仔,有時又有爆樽聲。

鄧先生估計佢哋得十幾廿歲,個金毛仔好似教仔咁,講完一輪耶穌就毆一下肥仔個pat pat,肥仔只係慘叫一聲,前後相信毆咗四下。鄧先生諗緊使唔使報警嗰陣,見到有保安員巡邏,金毛即刻停晒手放低木棍,肥仔又冇向保安求救,一班人移師去附近樹底繼續講數,成個過程擾攘咗大約半個鐘。保安都圍住停車場巡咗幾個圈,最後相信都冇人報警。