■一名戴住聖誕帽嘅男子,日前被拍下喺港鐵車廂內輕吻海報中嘅女藝人湯洛雯(右圖)。

爆相爆片:港鐵邂逅靚湯海報 情難自禁
6呎男「強咀」女神

「地下鐵碰着她,好比心中女神進入夢……」一個戴住聖誕帽、着橙色格仔恤衫同軍綠色長褲嘅六呎猛男,喺港鐵嘅車廂遇到佢心目中嘅女神,仲情不自禁走上前輕吻女神嘅前額。畫面就好似童話故事咁浪漫。但如果,佢只係錫女神一張貼喺車廂入面嘅廣告海報,件事係唔係即刻唔同晒?

海報印湯洛雯硬照
讀者阿Dan星期一(3日)夜晚8點幾,搭港鐵港島綫向堅尼地城方向嘅列車期間,聽到有類似跌手機落地嘅聲,於是向聲音傳嚟嘅方向望去,見到一個身高有1.8米嘅男人,眼甘甘望住貼喺車廂入面一張廣告海報,而且仲不斷錫印喺海報上面嘅長髮女代言人。

話說嗰張海報係推銷面膜嘅廣告,搵嚟有「靚湯」之稱、現年31歲嘅無綫小花湯洛雯做代言人影硬照。當時阿Dan同六呎男都有一段距離,睇唔到海報入面令到六呎男如癡如醉嘅女神係邊個,只係覺得佢行為好奇怪,於是離遠攞手機影低佢。從阿Dan拍攝短短18秒嘅短片中,可以見到六呎男都幾癡情,佢拎住個手機,突然間一手撳住海報,跟住咀落海報嘅湯洛雯個前額,錫完一啖,佢情深款款咁望住「靚湯」,然後又繼續連環輕吻「靚湯」三下,之後繼續定格望住張海報。

阿Dan話六呎男事後仲用手機影低張海報㖭。而坐喺海報側邊座位嘅女乘客,似乎顧住傾偈,冇為意呢一幕情景。最終阿Dan同六呎男不約而同喺中環站落車,阿Dan見六呎男咁早就戴定聖誕帽,估計佢可能要過一個Lonely Christmas,所以搵廣告海報中嘅女神慰藉一吓喎。

爆相爆片
爆相畀$500、爆片送$1,000嘅基本獎賞外,仲會選出每周之星,每星期最高單日總點擊頭5名即刻科水$10,000,而每月15號至翌月14號期間獲得全月最高單日總點擊者,更可以成為每月盟主,額外獎賞$100,000,係$100,000!爆相爆片必須為本報獨家採用,一經刊登立即有獎!
爆相爆片WhatsApp:63836568

參加細則
1.爆相爆片必須由參加者拍攝。
2.若本報發現任何造假情況,將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利,如有任何爭議,以本報決定為準。