撐枱腳被餵食爆戀情
陳瀅:陳家樂抵讚

現年32歲的陳家樂在6月與拍拖近4年的余香凝分手,面對傳媒採訪時更傷心落淚。陳家樂近日與現年29歲的陳瀅在《廉政行動2019》飾演男女主角,原來陳家樂已放下情傷,與「宅男女神」陳瀅撻着。讀者王小姐向《蘋果》「爆相爆片」,表示上周六約晚上7時,在中環一間日本餐廳遇見陳瀅及陳家樂撐枱腳。

王小姐說:「陳家樂嚟到坐咗入面,陳瀅之後到就坐外面,佢哋叫咗好多嘢食,傾得好投契。」陳家樂更有幫手燒食物,他們共用一碟醬油,見家樂將魚生遞向陳瀅嘴邊,陳瀅亦有低下頭,隱約聽見她笑了幾聲,但最後未有放入口,家樂只好自己食。雖然餵食失敗,但家樂全程跟陳瀅有講有笑,兩人不時咬耳仔,十足似蜜運中的情侶。
■陳瀅、陳家樂甜蜜飯敍後,前後腳前往攞車,似是怕被人發現,沿途警覺性甚高。DV圖片

前後腳走人
大約8時,兩人埋單離開。此時《蘋果》記者趕至,發現陳瀅先行步出,陳家樂則落後幾個身位,兩人有默契地裝作不相識,刻意保持距離未有交談,表現得十分避忌。兩人到停車場後,陳家樂急步登上陳瀅的跑車,陳瀅隨後將跑車駛至停車場出口,停低足足20秒都不開車,似是確認有否傳媒追訪,當她想再開車時,再停多10秒看清楚路面情況才出車,非常謹慎。

陳瀅之後踩行油,孖陳家樂返回位於尖沙嘴的香閨,記者守候至凌晨12時,都沒見到陳家樂離開。差不多同一時間,陳瀅就更新Ig Story,上載了一位女性朋友食水煙的片段,清楚見到她們的位置面向對面海的ifc,似乎陳瀅有心聲東擊西。
■陳家樂和陳瀅昨日分別出席活動,其中陳瀅大讚男方專業、勤力,並未為戀情落閘。攝影:陳慧安 陳家樂 攝影:陳俊強

「似兩兄妹」
陳瀅及陳家樂昨日分別出席公開活動,陳瀅在將軍澳現身,否認跟家樂拍拖:「我哋兩個只係普通食飯,當日因為一齊拍完劇收工。」對於被指車陳家樂返香閨,陳瀅解釋說:「因為我屋企樓下就係港鐵站,家樂冇揸車我就車埋佢,我返咗屋企後再出咗去。」被問到覺得家樂為人如何?陳瀅衝口而出:「陳家樂抵讚!」細數他很專業、很勤力。至於家樂是否她杯茶?陳瀅笑說:「我冇諗呢樣嘢,雖然有工作人員話我哋似兩兄妹。」記者笑言她以契哥契妹來掩飾拍拖很老土,陳瀅即刻扭轉身尷尬地笑。不過之後她仍然強調,不會因而與家樂有所避忌:「其實食飯好正常,冇必要避忌,咁人人都要食飯㗎啦。」

順路搭港鐵
陳家樂昨日則出席電影《死因無可疑》開鏡禮。陳家樂先表示沒有餵陳瀅:「係角度問題,應該係讀者揸機角度問題,其實係冇嘅,大家覺得似啫。」至於與陳瀅同車返香閨,陳家樂與陳瀅口徑一致:「唔係去佢屋企,佢屋企好近港鐵站,嗰日我冇揸車,佢就車埋我過海,我去港鐵站。」問到是否跟陳瀅拍拖?他再否認:「梗係唔係啦!我唔諗呢啲。」不過陳家樂亦大讚對方有義氣,似乎兩人大有發展空間。
採訪、攝影:畢紹基、吳耀輝、曹家誠、張俊銘