爆相爆片:貨車司機爭位吐口水被毆

■兩名司機互相追打,七人車男乘客下車勸阻。 廣告話齋揸車最忌心浮氣躁,星期日晚7點幾,深水埗營盤街同元州街交界美居中心對出燈位,就有貨車司機同七人車司機懷疑爭位爆發罵戰。貨車司機仲向對方吐口水,結果七人車司機㷫爆,落車追打對方!

警方到場 雙方扮冇事
目擊者楊先生當時咁啱揸車跟住貨車同七人車車尾,佢話現場燈口位有兩條行車線,貨車喺左邊線,七人車喺右邊線,兩車司機因為爭位爭執。楊先生話佢哋嘈嘈吓,貨車司機落車伸個頭去七人車司機位吐口水。
貨車司機吐完口水之後掉頭走,七人車司機就立即落車追,一直走到車尾,喺楊先生面前打貨車司機。七人車上面仲有另外兩男一女都跟住落車,個女人加入戰陣拍打貨車司機。楊先生話當時貨車司機得一個人,無得還手。好彩係拳頭交,打咗一陣都停咗手,貨車司機表面似乎冇乜嚴重傷勢。
楊先生話其實本來好小事箒,但個貨車司機向人吐口水,擺明就係挑釁。警員接到市民報案到場,但雙方就話冇打架,只係鬧交,報稱係其中一方開車門撞到另一方泊喺度架車,案件列作糾紛處理。