爆相爆片:以為係同鄉?非洲婦肉搏的士佬
「重慶」友晒馬幫拖

有巿民前晚喺尖沙嘴重慶大廈,目擊一場醉酒非洲婦大鬥的士佬好戲,結果好似曾志偉做掌門人口頭禪:「打和!」要出動警方持棍盾驅散圍觀人群,雙方同意和平解決,件事先收到科。
話說巿民陳先生前晚8點幾行過重慶大廈對開彌敦道,見到成班人喺度圍觀,好奇行入去睇吓,見到一個身穿黑衫嘅的士佬,同一位非洲婦互相拉扯,雙雙跌落地變成滾地葫蘆,陳先生見機不可失,即刻拎手機拍低呢場激戰。從陳先生提供嘅影片所見,非洲婦發晒爛渣,不斷扯住的士佬件衫起勢拖,搞到的士佬件衫爛咗大半截變咗香艷露肩裝。
雖然的士佬嘗試捉住對方隻手解鎖,不過非洲婦好似打搏擊咁出力扯衫,仲一時失衡跌咗落地,雖然的士佬俾佢扯到失晒身位,但反過來騎喺個女人身上,好似玩緊筋肉擂台咁,仲踩多佢兩腳,就喺呢個時候,的士車廂內突然走出一個同車男,嘗試做和事老分開兩人,但係雙方一直處於膠着狀態,互有糾纏。
【互相對峙】■的士佬以一敵眾,同圍觀嘅南亞人群互相對峙。

警持棍盾驅散人群
陳先生話由於事發地點喺重慶大廈,成班南亞人以為自己人被恰,幾乎同一時間走出嚟包圍的士佬對峙,不過大部份人都係食花生睇戲,並無出面解決件事。可能圍觀人群越來越多,人數超過100人,一時間群情洶湧,其後有警察趕到維持秩序,有警員手持警棍同盾牌驅散人群,以免控制唔到場面,據稱的士佬同警員呻非洲婦醉酒搭車,落車後突然折返,「話我偷電話呀!」未幾引發呢場打鬥。
警方回覆查詢,指前晚8點左右,一個非華裔女乘客喺深水埗搭的士去重慶大廈,到埗後落車,但隨即發現唔見咗手機,懷疑留喺的士入面,於是返轉頭搵,但就搵唔到,於是同姓倪(56歲)司機起爭執。
據悉女乘客滿身酒氣,加上語言不通,雙方無法溝通,其間女乘客涉嫌用手襲擊司機頸部,警方經調查後以涉嫌襲擊導致他人受傷拘捕女乘客。司機事後頸部紅腫拒絕送院,最終同意和解。但個手機究竟去咗邊,真係冇人知!

爆相爆片
#MeToo個個都要爆,但係唔一定要舉牌!只要你肯爆,無論好事、壞事、憤怒事,正嘢、衰嘢、古怪嘢,影低佢,《蘋果》幫你爆,更設爆相爆片大獎賞,除咗爆相畀$500、爆片送$1,000嘅基本獎賞外,仲會選出每周之星,每星期最高單日總點擊頭5名即刻科水$10,000,而每月15號至翌月14號期間獲得全月最高單日總點擊者,更可以成為每月盟主,額外獎賞$100,000,係$100,000!爆相爆片必須為本報獨家採用,一經刊登立即有獎!
爆相爆片WhatsApp:63836568

參加細則
1.爆相爆片必須由參加者拍攝。
2.若本報發現任何造假情況,將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利,如有任何爭議,以本報決定為準。