■保安擋住水錶房木門,力阻鹹水湧出。

爆相爆片:爆喉管鹹水淹錶房 住戶嚇餐飽

馬鞍山嘅居民一直飽受鹹水問題困擾,小記聽住喺嗰區嘅朋友講,鹹水喉爆得好密吓,差不多個個月都會停幾日,住喺富安花園嘅劉先生就親眼見到呢個咁壯觀嘅情景。

樓梯變瀑布
話說噚日凌晨5點幾,住喺富安花園16座高層嘅劉先生突然聽到警鐘響,響咗半個鐘隔籬鄰舍都冇反應,劉先生擔心有事故發生,於是打算搭升降機落地下了解,點知部升降機去到低層,升降機頂開始滴水,升降機內仲有兩位女士,「佢哋話好驚,我以為火警」。當升降機門喺3樓打開時,劉先生見到保安員用力按住水錶房嘅木門,大量鹹水喺門內湧出,水深蓋過腳掌,兩名住戶仲嘗試用掃把清理積水。
當劉生去到地下,兩名保安主管答佢唔知乜嘢事,而1樓通往地面嘅樓梯亦有大量鹹水流落黎,好似瀑布咁,擾攘咗差不多10分鐘,警鐘停咗,劉生先返咗屋企。佢話住咗喺馬鞍山約一年,由於區內鹹水喉老化,所以成日都有鹹水喉爆裂,但爆得咁勁都係第一次見。