爆相爆片:踩單車手機跌入河 學生落水執

■事主落河搵返手機,但已浸壞咗。 𠵱家嘅智能手機,閒閒哋都幾千蚊,學生哥真係要節衣縮食先買得起,一個唔小心跌咗,都真係會好肉赤,但千祈唔好似呢位哥仔咁,為咗執返部跌咗落河嘅手機而落水,因為自己命仔先係最珍貴。

電話架夾唔實惹禍
升讀中四嘅姓彭同學,喺前日黃昏6點左右,原定同兩位朋友仔,由大圍踩單車入大埔大美督,當去到沙田城門河近大會堂位置,同行嘅朋友仔部手機竟然由車頭電話架跌落地再彈落河,由於部手機只係買咗幾個月,當時用咗差不多六千蚊買,朋友仔即刻好緊張,猶豫咗一陣,就跨過欄杆行落水。
彭同學話,當時有喝止過朋友仔,建議佢先搵條安全繩綁住自己,但朋友仔太心急等唔切,另一位朋友仔就坐咗喺石上,顯得不知所措,跌電話嘅朋友仔喺淺水位置左挖右挖,其間挖出一堆垃圾,大約10分鐘後,終於搵返部手機,但浸咗喺水太耐,部機已經熄咗開唔返。
聽到呢度,小記忍唔住話咗彭同學幾句,因為命仔緊要,落水時又冇安全措施,跣親真係可大可小。彭同學就話,作為學生哥,大拿拿六千蚊唔係小數目,朋友仔都儲咗一排先夠錢買,如果畀着佢自己都會咁做,「如果落雨、潮漲,當然唔會畀佢落水」。由於朋友部電話壞咗,估計佢都會拎去維修,彭同學就勸佢買過個好少少嘅電話架,因為佢哋之前已經發現個架夾得唔實,估唔到最後搞成咁囉!