爆相爆片:暖男九巴站長 遮風擋雨

■每逢巴士埋站,站長就攞住把特大遮喺巴士站為乘客擋雨。 歌都有得唱「在世間遮風擋雨有一種愛……」孔小姐每日放工都會喺紅磡海底隧道口巴士站搭巴士過海,平時佢見到啲站長比較粗聲粗氣,催乘客上車,但前日一位身高約5呎8吋、身形瘦削、戴眼鏡後生站長嘅一個舉動,就令佢對站長嘅印象改觀!
話說前日有驟雨,6點放工時間紅磡仲落大雨㖭,紅隧巴士站墟冚就梗㗎啦,個個都好狼狽,有人冇帶遮仲慘變落湯雞㖭。現場有幾個站長喺度指揮以免人多混亂,人群之中,孔小姐見到個後生站長揸住一把特大遮喺巴士站跑嚟跑去,每逢有巴士埋站,佢就會跑埋去開遮,原來為上車嘅乘客擋雨。

被讚謙稱「應該嘅」
雖然巴士站有簷篷,但當你踏上巴士嗰吓,都總會揼到雨嘅,孔小姐見到咁嘅情景,大讚暖男站長:「Good job!真係好窩心!連其他站長見到都讚佢幾細心喎,佢只係話應該嘅!」孔小姐因為排隊等緊巴士,始終影唔到站長嘅正面,佢希望巴士公司認得出站長嘅背影,表揚同鼓勵吓咁盡責服務嘅員工。唔知九巴收唔收到乘客嘅意見呢?