爆相爆片:俄籍Running man空降中環橋頂

■俄仔喺ifc二期通往碼頭嘅天橋頂來回跑步。 中環國際金融中心(ifc)人來人往,想拍片又唔想影到咁多人可以點?一個俄羅斯籍男子就諗到辦法,噚日朝早11點幾,有個女途人發現一名俄仔喺ifc二期通往碼頭嘅天橋頂跑步,一度以為佢係睇唔開企圖跳橋輕生,於是報警。警員到場時,嗰名24歲俄仔已返到安全位置,佢亦無受傷,調查後發現原來佢同另外兩男一女拍攝緊影片,警方其後將佢帶返警署作進一步調查。

同伴橋底拍片
讀者吳先生當時返緊屋企,都被離奇嘅呢幕吸引住,見到俄仔喺天橋頂由頭到尾來回200米跑來跑去,佢話ifc有大約60人同樣覺得好奇,隔住玻璃圍觀,其間仲有個呀叔鬧俄籍男「咁危險!」吳先生話第一次見到有人喺天橋上跑步,後尾行經天橋先發現橋底有大約3、4個人拎住攝錄機,先知佢地拍緊片。
不過吳先生認為俄仔咁做一唔小心跌落地,隨時害己害人,最後仲引嚟消防車、救護車同警車到場戒備。