爆相爆片:師奶搭錯巴士上高速
洪荒力開門跳車

■師奶(箭嘴示)用洪荒之力夾硬拉開車門落車。 搭錯車可能大家都試過,但你會唔會叫司機停車畀你落車?粉嶺一位顧家師奶前日朝早搭錯車,但巴士已經駛上高速公路,佢聲稱為咗趕返屋企照顧小朋友,竟然喺行車途中嘗試拉開巴士車門,司機嚇到馬上停車,最終師奶用洪荒之力夾硬拉開車門落車,徒步離開。

乘客大叫:你唔好咁拉啦
住粉嶺聯和墟嘅徐小姐表示,星期二朝早8點正乘搭由聯和墟總站開出嘅九巴277X線,一位約50歲師奶喺祥華邨上車。一輪上客後,巴士準備駛上粉嶺公路往九龍方向,呢個時候師奶發現唔對路,原來佢係短途客打算喺華明邨落車,但冇留意到8點前班次唔經華明邨,於是要求司機畀佢落車。徐小姐指以住市民搭錯車都要去到大老山隧道,再搭倒頭車,第一次見有人喺公路上強行落車。
呢位師奶軟硬功兼施,徐小姐指師奶最初誤會巴士自行改道,所以不斷抱怨司機,仲話跑住趕上車,要求停車,但司機拒絕並指正佢冇留意班次。師奶得知真相後馬上使出軟功,認係自己錯,向司機求情「伯伯,求吓你畀我落車」,話華明邨屋企有細路要湊,不過司機基於安全無答應,架巴士就駛到大學站附近。
由於請求咗好耐都唔奏效,於是師奶再改策略,使出硬功嘗試拉開車門。徐小姐指車上一個男乘客即刻上前大喊「你唔好咁拉啦」,另一個女乘客亦勸司機開門畀師奶落車,司機無奈惟有停車但堅持唔肯開門。徐小姐直言當時覺得「好恐怖,驚佢死」,全車人都靜觀其變。最終師奶情緒激動之下,以蠻力拉開前車門,徒步走向大學站方向,而巴士司機同乘客講唔好意思後繼續行程,延誤大約10分鐘。