■梁氏夫婦屋企一直係動物天堂,今次更拍下燕子生育過程。黎家駒攝

爆相爆片:屋主嘆燕子亦遇土地問題

燕子40天成長過程轉眼飛逝,記錄影片嘅梁太大為感觸,眼見燕子父母選址自己屋企簷底而喜出望外,目睹燕子媽媽銜走死去的孩兒時又悲從中來,短短日子令梁太感受到生命嘅奧妙,不過乳燕出世後不足一個月,就被父母趕走離巢,又令佢不禁慨嘆燕子同香港人一樣,都係要面對土地問題。
錦綉花園遠離元朗鬧市,梁太兩夫婦同兩隻愛犬6年前搬入,梁氏屋企一直係動物天堂,不時有雀鳥飛到後花園,除燕子外更曾經有相思雀闖入家中作客。今次機緣巧合記錄到燕子生育過程,梁太深受感動,最記得燕子父母每日來回幾十次,只為餵飽稚子,但最終仍有兩隻幼燕夭折,更由父母親口叼走。

望市民多體諒小動物
梁太又感慨近年幾次爆發禽流感災情,令唔少市民聞鳥色變,不時向食環署投訴,搞到野鳥無處容身,連燕子父母都要趕走啱啱成長嘅仔女離開。佢話,拍片除咗希望同市民分享新生命喜悅,亦希望市民能體諒小動物,等佢哋有安身之所。網民大多都認同,留言祝福燕子,更有人話:「我都想燕子喺我屋企築巢。」