爆相爆片:霸𨋢搬屋工踢傷女保安

■紅褲搬運工人起飛腳踢向女保安。 搬屋搵着啲唔專業嘅公司同工人,有時真係累街坊。前日(10號)下晝12點左右,鰂魚涌康景花園B座有住客搬屋,兩個搬運工人霸住部𨋢搬嘢上樓,其中一個着黑衫嘅工人喺𨋢入面接應,另一個40幾歲着灰色衫紅褲嘅工人就喺𨋢外面。佢哋將好多袋嘢放喺𨋢門外阻住晒,仲搞到居民無𨋢用,居民梗係投訴啦。

涉事公司:唔知邊個
22歲姓鄭女保安員嚟到處理,當時着紅褲嗰位工人推完一板車嘢入𨋢塞滿咗,仲想推另一板車入𨋢,女保安見到咁,於是就企喺𨋢入面,阻止工人再搬貨入𨋢。點知呢個紅褲搬運工人竟然發爛渣,起飛腳踢傷呢位弱質纖纖嘅女保安。
事後警員接到呢位女保安報案,趕到現場調查,將女保安送去東區醫院治理,但個涉案工人就已經走咗。案件列作襲擊,暫時無人被捕。有目擊事發經過嘅居民,睇唔過眼個搬運工踢傷女保安,就向《蘋果》爆相爆片,一定要追緝兇徒咁話!
《蘋果》打去問過涉事嘅實惠搬屋有限公司,對方有個自稱姓黎嘅男人就一味話唔清楚件事,又話唔知邊個工人踢傷女保安喎。不過閉路電視就清楚影到工人個樣囉。