爆相爆片:三隻醉貓擒的士 踢又踩

呢個57歲姓曹的哥好黑仔!前晚(10號)佢揸的士經過灣仔道與天樂里交界停燈位,點知遇着三隻南亞醉貓,喺雙黃線夾硬要上的士,佢唔肯開門,話晒今個月1號起喺限制區上落客,俾人捉到嘅話,張牛肉乾盛惠560蚊㗎喎。三隻醉貓上唔到車發爛渣踢車門,其中一人仲擒上的士車頂踩爛個燈箱。 ■其中一隻醉貓擒上車頭冚,踢爛大銀幕。

路過同鄉影低惡行
跟住佢失平衡由車頂跌落地,起番身又爬上車頭冚,摩打腳咁踢到的士大銀幕變蜘蛛網,另一個就坐喺的士前面馬路唔畀的哥,開車。路過嘅同鄉李先生影低晒佢哋失禮鄉親嘅惡行,的哥一直喺車入面打電話,相信佢報警。
雖然係同鄉,李先生大義凜然咁話同鄉唔啱:「香港有法律,唔應該毀壞的士,用咁暴力嘅方法!好心痛,我哋係土生土長,應該貢獻社會,想做一個好形象畀香港,當呢個係自己個家……你一個南亞裔做呢啲行為,全世界就會覺得個個都係一樣!」
警方證實,前晚9點幾,灣仔天樂里同灣仔道交界,一名南亞漢偕兩友人想坐上的士不遂,跳上的士、又拍又打整爛車窗,的士司機報警,警察到場拉咗一個48歲南亞漢涉嫌刑毀。的哥同阿sir講,喺燈位之前嗰三個人曾經走出馬路攔截佢架車,佢已經扭軚避開,但佢哋仲追上嚟。