爆相爆片:交警開咪提入錶
Benz男跳掣:除槍隻揪!

天口㷫,唔通人都躁啲?周一下晝5點幾,有位着淺藍色恤衫短褲嘅車主,揸住部白色Benz喺旺角弼街咪錶位泊車,懷疑佢冇入錶,結果俾巡邏嘅交通警員,開咪提佢要入番錶。點知呢位仁兄突然「跳掣」狂鬧阿Sir,唔單止粗口橫飛,仲挑釁阿Sir:「除咗支槍隻揪!」使唔使咁躁呀!
咦!睇真啲,原來部Benz嘅車牌係「1 ON1」,唔通有所暗示?1 ON1係唔係隻揪隻咁解,可能要請教Ben Sir先知,但好彩嗰位阿Sir夠冷靜,一啲都冇勞氣。圍觀嘅途人都唔抵得Benz男所為,出聲幫阿Sir之餘,仲拍片3分鐘㖭!
■着藍色恤衫嘅平治車主不停指罵交警。讀者提供圖片

街坊:揸Benz就入錶啦
從段片睇到,當時Benz男好唔滿意阿Sir叫佢入錶,大聲講:「啱啱泊好車咋嘛!」仲講晒粗口叫阿Sir「禮貌啲」。有街坊都睇唔過眼,出聲撐阿Sir,對住Benz男話:「睇咗你好耐啦,揸Benz就入錶啦!」
佢哋拗咗一陣,Benz男又叫囂:「入咗30秒都唔夠,你咪抄囉,怕X啊?」阿Sir只係笑笑口話:「唔使入,怕咩箒,唔好震,又震啦先生」。Benz男即時㷫爆挑機:「一係你除咗支槍隻揪啦!」阿Sir就一於唔睬佢。
到底平治最後有冇俾阿Sir抄牌呢?《蘋果》事後問過警方,警方就話當日大約5點15分,西九龍總區交通部人員喺旺角弼街巡邏,發現一部私家車冇畀咪錶費用,經過人員勸喻之後,嗰位司機畀番費用。不過警員發現部車嘅玻璃同車牌展示嘅形式,違反法例規定,警方稍後會向呢位司機發出「欠妥車輛報告」。