軍裝警駐守 反黑巡查

■反黑探員就到場調查同視察,的士站閘口仲有多位軍裝警員駐守,霎時間都再見唔到有的士打尖。 落馬洲的士站有黑幫代客打尖曝光之後,案件交由邊界警區重案組跟進,警方話高度重視,仲立即打擊掃蕩。噚日清晨約5時,反黑探員就到場調查同視察,的士站閘口仲有多位軍裝警員駐守,霎時間都再見唔到有的士打尖。
現場的士站派籌區,如常喺朝早6點半派籌畀輪候嘅的士司機,佢哋取籌後可以駛入去的士站上客,站裏面可以容納36輛的士停泊,早上乘客人流就唔算多,亦冇人再夠膽公然安排黑的打尖。咁梗係啦,反黑同軍裝警員都喺度,如果有人仲敢靠嚇安排黑的打尖,唔通真係博拉咩!
的士司機威哥就大讚警察維持秩序,話每朝都會喺度排隊上客,希望唔會再出現打尖情況。亦有的士司機話,其實多年前上水的士站都有類似黑幫代客打尖問題,但經過各界努力之後,終於先回復公平嘅營運環境。佢哋都希望警方同運輸署可以打擊不法活動,還守法的士司機一個公道。