爆相爆片:$300「會費」代客打尖
黑的入站 陀地開路

■陳生俾7架黑的打尖。讀者陳先生提供圖片 有懷疑黑幫成員喺青山公路的士排隊輪候入落馬洲支線管制站嘅地方,安排黑的打尖,仲用恐嚇同阻路嘅方法,逼走守法嘅司機。正義的哥陳先生,星期日排咗個幾鐘,點知俾「陀地」叫佢改排隊尾,結果50秒內有7架的士打尖。陳生事後報警,警方噚日朝就喺邊境管制站拉咗一個男人,佢涉嫌刑事恐嚇同自稱三合會成員,之後再喺羅湖同沙頭角管制站拉多兩個,佢哋涉嫌刑事恐嚇。
40歲嘅陳生做咗職業司機十幾年,入行揸的士只有個半月,佢眼見今次歪風,忍唔住爆料話:「唔應該縱容啲不法分子,自稱黑社會又點?好多人都係靠嚇,香港係法治之區,打999警察10分鐘就到啦!」
事緣每朝6點幾,落馬洲支線口岸都有一批大陸過境嘅乘客搭的士,唔少的士司機喺青山公路近皇巴站附近排隊,等6點半開放「派籌區」就攞籌去支線口岸載客。不過有黑幫吼準有肉食,就要啲司機每月畀三幾百蚊做「代客打尖」。

50秒內7車打尖
喺星期日嗰朝,陳生未到5點到場排隊,等到6點3突然有個男人走嚟,多次問佢:「你知唔知呢度規矩呀……你排返後邊啦!」陳生至少10次話:「我唔明,係乜嘢規矩?」對方見到陳生唔肯就範,就越來越兇:「我話畀你聽,哥仔,每個站頭都有佢嘅規矩。」又用粗言穢語要求陳生排返後面:「你唔係我哋member,就咁X簡單。」
陳生追問何謂會員?對方竟然答:「黑社會會員!」之後喺50秒內,呢個男人放咗7架的士喺陳生嘅的士面前打尖,過程俾車cam錄晒。陳生多謝今次警方迅速執法,佢仲希望其他同業遇事要挺身舉報。