【短片】【爆相爆片】準新人影Pre-wedding 塞住港鐵通道唔肯讓路

結婚係人生大事,唔少準新人都好重視Pre-wedding,不惜去外國取景影婚紗相,或者揀啲有特色嘅地標做背景。李小姐噚日下晝5點幾同丈夫喺港島天后港鐵站搭地鐵,就見到一對準新人企正喺月台通道中心影婚紗相,但係佢哋冇讓路畀乘客行,李小姐形容要黐埋牆邊先行到過去。

現場係天后站通去柴灣方向月台嘅通道,李小姐見到4個人喺度影婚紗相,包括一對準新人,同埋講普通話嘅女攝影師同助手。李小姐話當有乘客行過嘅時候攝影師唔會影相,但係一對準新人亦都唔會移玉步讓乘客行過,繼續企喺中間。

李小姐覺得佢哋咁樣阻住條通道都冇職員干涉好奇怪,但因為佢哋趕時間,去到坑口站先通知港鐵職員有件咁嘅事。港鐵發言人話,根據車站紀錄,當時天后站職員透過控制室閉路電視見到有人喺一號月台影相,當事人好快已經離開車站。不過港鐵都呼籲乘客為己為人,要保持車站通道暢通,唔好影響其他乘客。

至於喺港鐵範圍入面影婚照有冇違反港鐵附例?發言人話不能一概而論,要視乎實際情況喎。

你敢爆,我敢獎! 即Call《蘋果》24小時爆相爆片熱線63836568
準新人企正喺通道中心影婚紗相。