【短片】【爆相爆片】正義男港鐵內制服偷拍裙底漢 色狼跪地求饒都冇用

港鐵不時都有偷拍裙底案發生,好似周三晚(27日)7點幾放工繁忙時間,有個色狼就喺金鐘站上咗架駛往荃灣方向嘅列車,佢當時懷疑趁列車上塞滿晒人,竟然「博大霧」用手機偷拍一位OL嘅裙底。好彩有其他乘客見到,即刻見義勇為幫手合力捉住個色狼。個色狼一度跪地求饒,但受害OL同其他乘客梗係唔放過佢啦,最後事件交咗畀港鐵職員處理,警方接報到場拉人。

市民何先生話當時喺港鐵荃灣綫列車上,佢就拍低咗色狼個樣,睇落去個色狼都似乎好眉好貌,著住紅粉恤衫西褲同孭背囊,個樣都幾斯文,冇諗過佢竟然會偷拍人裙底咁衰啫。何先生話個色狼用手機影嗰位OL嘅裙底時,嗰位OL原來都冇發覺,好彩其他熱心乘客見到話畀位OL知,大家幫手一齊捉人,仲即時㩒緊急通話掣通知港鐵職員。

個色狼「斷正」俾人捉住後,佢初時都唔肯認有拍人裙底,何先生話此時有乘客㩒住色狼部手機,其間個色狼竟然跪地求饒,叫人「畀次機會」佢喎。但原來個色狼只係扮道歉,佢仲想趁人唔為意,偷偷哋刪除偷拍咗嘅裙底相片,結果其他乘客即刻阻止佢,唔畀佢delete啲相消滅證據。之後港鐵職員接報上咗列車,乘客就將色狼交畀職員報警處理。

警方發言人就話,6月27日晚大約7時13分在太子站收到港鐵職員報案,大意是有乘客告知港鐵員,指有人在港鐵列車上涉嫌偷拍女乘客。警方接報到場拘捕一名30歲譯音姓熊男子,指他涉嫌「破壞公眾體統」,在列車上以手機偷拍一名30歲女乘客嘅裙底,當時車上有乘客幫手制服疑犯,案件交由CID跟進。

你敢爆,我敢獎! 即Call《蘋果》24小時爆相爆片熱線63836568
穿粉紅恤衫的男子涉嫌在荃灣綫港鐵列車內以手機偷拍女子裙底被熱心乘客制服,他一度跪在車廂地上(圖)疑似求饒,其後港鐵女職員上車(右)把疑犯交警方跟進(讀者提供) 涉以手機偷拍港鐵女乘客裙底男子一度跪在車廂地上疑似求饒(讀者提供)