【短片】【爆相爆片】四眼男入錢變偷錢 車長:真係好離譜

明目張膽,巴士乘客喺車長面前偷錢箱啲錢!一個四眼男星期一(18日)喺港島東區搭巴士,車資係$6.1,佢入散銀落錢箱後隻手喺度攝下攝下,跟住抽咗張廿蚊紙出嚟就行入去車廂,以為神不知鬼不覺,但佢呢個咁特兀嘅舉動已經引起咗車長注意,同時畀車長安裝嘅私人車cam影低晒。

企圖偷錢箱啲錢嘅四眼男,星期一下晝3點幾喺柴灣道富城閣巴士站搭新巴8P線,去灣仔方向,佢上車入完散銀之後,隻手仲喺錢箱口「潛下潛下」,結果抽咗一張廿蚊紙出嚟行咗去,心水清嘅車長記得,嗰張廿蚊紙明明係前一個站一個後生仔因為八達通冇錢、又冇散銀而入落去嘅,於是即刻喝住四眼男。

姓林車長同《蘋果》講,當時四眼男仲狡辯話張廿蚊係佢嘅,但最後都畀番車長,將廿蚊紙入番落錢箱,佢仲同車長講:「師傅,我入咗錢㗎,唔好意思。」車長講番,上一個站個乘客入咗張廿蚊紙落錢箱,點知click住咗,張銀紙冇跌落錢箱入面,車長唔敢掂個錢箱,驚引起誤會,所以由得張銀紙喺度,諗住一陣有人入散紙嘅話,張紙幣自然會跌落去,誰知咁都會引起人賊心。

車長初頭仲以為四眼男好心幫佢篤張廿蚊落去錢箱,因為見到佢有入散銀嘅,所以車長初時冇出聲,但見到佢愈篤愈過癮,仲一手攞咗張廿蚊出嚟,就即刻喝住佢。不過車長冇報警,「見佢畀番張廿蚊出嚟就唔追究,驚報警會阻住成車乘客,但依家啲人可以咁樣,真係好離譜!」

你敢爆,我敢獎! 即Call《蘋果》24小時爆相爆片熱線63836568