【短片】【爆相爆片】一家四口遇上澳門黑的 硬淨媽咪KO屈錢司機

早排先有台灣遊客投訴係澳門被黑的坐地起價並出言恐嚇,近日又到香港人中招。話說一對香港夫婦,帶同一歲孖女去澳門玩完後搭的士去碼頭,點知個架係黑的,30幾蚊車費,司機竟獅子大開口要收200蚊,夫婦拒就範,司機拗不過終肯開車,但恐嚇話要吹雞教訓夫婦,最後因落雨塞車始未成事。

事發喺周日下晝4點,當時落緊大雨,關氏夫婦係葡京酒店門口截的士去港澳碼頭準備返香港,兩夫婦各抱住一名女兒登車30秒後,揸緊車嘅司機突然開口話要收$200先去,畀咗錢先開車,兩公婆唔肯,個司機見老屈唔得,就話「澳門個個司機都係咁,第一日搭車咩」,又話「有錢就開車,無錢學咩人搭的士」。

司機見禁錮呢招唔work,猛咁叫兩夫婦落車,兩夫婦唔甘心被欺負,即時口角還拖,司機將車停路邊,雙方不停鬥嘴僵持不下,過咗5分鐘司機終肯開車,但同時透過手機call台吹雞,話有客唔畀錢,叫人去港澳碼頭做嘢,且沿途恐嚇夫婦,又不時急煞停及亂扭軚嚇車內人。

兩夫婦抱住孖女唔敢亂郁,又驚真係有吹雞嚟嘅社團,終於捱到碼頭,此時call台亦傳嚟被吹雞手足嘅聲音,黑的司機疑見塞車,回應話「費事啦,都4點嘞,好塞車」,然而事情仍未結束,咪錶顯示車資35元,但司機不停咁用手機影佢哋嘅相,又話唔收錢,叫佢哋留番啲錶錢去執藥。

由於BB車放在車尾箱,兩夫婦驚司機趁他們落晒車開走的士,於是老公先攞BB車,再抱個女走。其後老公畀50元司機,司機唔找錢,仲講句死港燦,跟住開車走。夫婦話,「見到兩個女嚇到面都青,好心噏」話對澳門治安失望。

你敢爆,我敢獎! 即Call《蘋果》24小時爆相爆片熱線63836568
司機不時急煞及亂扭軚嚇車內的人。(讀者提供)