【短片】【爆相爆片】【兜巴星】疑男友偷食10女 紅裙女狂摑41巴

【09:48更新】更新動新聞
問世間情是何物,情侶間嘅小風波,旁人懂甚麼!但係,搞到當街當巷互摑仲拉扯頭髮就實在.....太失禮,文員卓小姐周四(4月26日)下晝4點行經油塘港鐵站B出口,就聽到大大巴摑落嚟嘅啪啪聲,「起碼打咗幾十巴」。從佢拍到嘅片段,當時一對情侶喺站外一角嘈交,「個女仔係咁摑個男仔度,唔知有無打咗50巴,事緣好似係個女仔覺得男嘅偷食出軌。」

片段中,住好搶眼螢光紅色袋嘅女事主著住短裙,將個男仔迫埋牆角,一路指手劃腳就男仔出軌問題問罪,鬧完就摑,左手摑完,右手摑,男仔其間亦還擊摑番對方一巴,不過佢都係被摑嘅多,還擊嘅少,有時被摑之後仲好急急用手撥番亂咗嘅頭髮。

就出軌一事,個男仔一直無否認,只係「哦哦」,反而女事主越鬧越激動,不停話「肯定有」、「十幾條女...你自己搵十條女搞嘢」,跟住連續向個男仔摑20巴,左右手連環開弓,右手摑完輪到左手摑,清脆掌摑聲此起彼落,簡直巴巴有力。卓小姐形容嗰刻聽到「好大聲啪啪」,查實喺全長2分05秒嘅片段中,至少傳出41吓掌摑啪啪聲。

卓小姐指該男子亦出手扯對方頭髮搖了數次,而不少途人看到亦呆了,亦有學生哥直行直過睇唔到,「好多路人停低,但無人幫手或報警」。她承認自己當時一直拍片,但亦有留意兩人情況,而當時亦有港鐵職員聽到嘈吵聲出來查看,又指若兩人武力升級會考慮報警,其後因趕時間離去,並希望兩人和氣收場。

警方發言人話,周四(4月26日)午4時前後,未接獲市民報案話港鐵油塘站有人打交。

港鐵發言人表示,根據車站記錄,周四(4月26日)下午約4時,油塘站職員接到乘客通知,指在車站B2出口有一男一女爭執,車站即時派員了解,到場後確實發現一男一女正在口角。數分鐘後,雙方開始有身體接觸,職員即時上前作進一步了解、及詢問有關人士有沒有需要提供協助,但兩人隨即離開車站範圍。

你敢爆,我敢獎! 即Call《蘋果》24小時爆相爆片熱線63836568
紅裙女狂摑男人41巴掌。(讀者卓小姐攝)