【短片】【蘋民直擊】情侶公院女病房瞓床攬錫 女院友:換尿片時間都唔肯走

瑪麗醫院骨科女病房竟淪為外籍情侶調情勝地?一名外籍男子今早陪伴受傷女友進入病房,之後便「賴死唔走」,其間即使房內其他女病人需要換紙尿片及洗傷口,外籍男依然留在病房,還躺在病床上與女友「攬攬錫錫」,情景「該燴」,引起房內其他女病人不滿,需兩度親自尋求醫院保安協助。

讀者朱小姐是骨科病房內其中一名女病人,因病留醫病房已有一年多。她表示,該對情侶於今早6時許入院,女方疑手部受傷,但行得走得,外籍男則一直在病房陪伴女友,至早上7時許病人換紙尿片時間,護士曾勸喻外籍男離開,但外籍男卻未有理會。

「我覺得好有問題,例如換片,好多地方都唔係有簾遮住嚟換,咁俾你睇晒。」朱小姐又謂:「佢瞓喺張床度攬住個女病人(外籍男女友), 喺張床度攬攬錫錫,之後醫生巡房都唔肯出去!」朱小姐認為院方需要保障病人私隱,於是四度向護士投訴,要求將外籍男趕出病房,不過「姑娘同佢講完就算,人哋唔肯走都冇下一步行動」。

朱小姐極為無奈,曾致電院方聯絡主任,但一直無人接聽,惟有兩度親自致電醫院保安協助。「兩次保安只係企喺度,冇做任何嘢,只係同姑娘講可以報警。」朱小姐稱,第一次叫保安後,外籍男於早上8時許離開過病房一次,之後9時許又返回病房,便又拒絕離開,於是她再叫多一次保安。不過,外籍男再一次離開病房後,之後又再返回病房與女友打情罵俏,兩出三進,令朱小姐甚感無奈:「到我洗傷口時,佢仲喺度,姑娘只係幫我閂咗個簾。」

朱小姐理解家屬可以留在病房照顧病危親友,但「個女又唔係咩病危,又瞓喺張床度攬住,攬唔該出去,唔好喺度,我覺得好有問題成件事」。對於自己的投訴未被妥善處理,更要病人親自找醫院保安解決事件,朱小姐稱:「成件事真係好奇怪㗎,佢哋仲覺得我唔應該咁做,話我多事,但我真係忍唔到!」

涉事外籍男向《蘋果》承認護士曾勸喻他離開,但他想陪在女友身旁表示支持,所以一直留在病房。他並未得悉此舉引起其他病人不滿,亦不願透露女友的病況。

瑪麗醫院發言人回應事件時稱,醫護人員曾勸喻該男子離開,但不成功,考慮到該病人情況,評估過無影響病房運作或其他病人,酌情讓他留下。一般而言,病人中風或情緒不穩,都可讓親屬陪伴。

你敢爆,我敢獎! 即Call《蘋果》24小時爆相爆片熱線63836568
朱小姐指外籍男躺在病床上與受傷女友攬攬錫錫(朱小姐提供圖片) 朱小姐認為院方應保障病人私隱(翁鈺輝攝) 事發瑪麗醫院E4女骨科病房(翁鈺輝攝) 朱小姐稱:「兩次保安只係企喺度,冇做任何嘢(趕走外籍男)。」(朱小姐提供圖片)